Kanpetlet Peng, Chinletmun Khua Vanlawng Kahdohnak Ruang Ah Tualchung Mi Pakhat Thi, Minung 4 Hliamtuar>>>>>>

Chinram thlanglei, Kanpetlet peng, Chinletmun khua ah SAC ralkap nih nihin June 11 zinglei ah vanlawng in kahdohnak an tuah ruang ah tualchung mi pakhat a thi i minung 4 hliam an tuar, tiah theih a si.
Chinletmun khua vanlawng kahdohnak ruang ah cun tualchung mi thi le hliam an um pin ah khuachung sianginn pahnih le umnak inn 6 a rawk, tiah theih a si.
Atu zarh chung ah SAC ralkap nih Chinram thlanglei Mindat peng le Matupi peng ah a ruang um lo in timh ciammam tein vanlawng in kahdohnak an tuah i pehtlai in bomb an thlak ruang ah inn a rawk mi a tam, tiah theih a si.

Hramhram in nawlngeihnak laak a si hnu ah SAC ralkap vanlawng kahdohnak ruang ah Chinram ah Biakinn 40 hrawng a rawk cang, tiah theih a si.
RFA nih a khawmh mi cazin ning ah SAC ralkap nih hramhram in nawlngeihnak an laak ni thawk in tukum 2024 May thla dongh tiang ah SAC ralkap hriamngan le vanlawng kahdohnak ruang ah tualchung mi 1,942 an thi i, minung 3,866 nih hliam an tuar.

Waingmaw Peng Ah Ni Khat Chung Ah KIA Ṭangṭi Phu Nih SAC Ralkap Sakhan 18 An Laak>>>>>>>>>>>

Kachin ramkulh, Waingmaw peng ah nizan June 11 ni khat chung ah SAC ralkap sakhan 18 cu KIA hruai mi ṭangṭi phu nih an laak kong, thawng laaknak hrampi nih an chim. Nizan kahdohnak ah cun KIA ṭangṭi phu nih SAC ralkap sakhan ngan mi 6 an laak i a dang sakhan 12 cu an chuahtak mi a si, tiah an chim.
Waingmaw peng, Sadone Byuha sakhan telh in SAC ralkap sakhan 6 cu KIA ṭangṭi phu nih an laak i SAC ralkap 30 leng an tlaih hna, hriamnam tam ngai zong an laak kong thawng laaknak hrampi nih cun an chim.

Nizan June 11, zanlei suimilam 5:00 hrawng ah Sadone Byuha sakhan cu KIA hruai mi ṭangṭi phu nih an laak i Waingmaw—Kanpaikti lampi thluan um mi SAC ralkap sakhan ah minung an um ti lo, KIA nih pehzulh in kahdohnak an kalpi i Kanpaikti khuapi sakhan pakhat lawng a taang cang, tiah theih a si.
“Nizan June 11, zinglei suimilam 5:00 hrawng ah Sadone Byuha sakhan an laak i a zate ah sakhan 6 an laak, Waingmaw—Kanpaikti lampi ah SAC ralkap an um ti lo, Kanpaikti khuapi um sakhan pakhat lawng a taang cang, nihin i tlaih mi hi SAC ralkap, BGF le Pyituhsit 30 leng an si, hriamnam laak mi cu a tam ngaingai,” tiah KIA thawng laaknak hrampi nih an chim.