Kachin ramkulh, Waingmaw peng ah nizan June 11 ni khat chung ah SAC ralkap sakhan 18 cu KIA hruai mi ṭangṭi phu nih an laak kong, thawng laaknak hrampi nih an chim. Nizan kahdohnak ah cun KIA ṭangṭi phu nih SAC ralkap sakhan ngan mi 6 an laak i a dang sakhan 12 cu an chuahtak mi a si, tiah an chim.
Waingmaw peng, Sadone Byuha sakhan telh in SAC ralkap sakhan 6 cu KIA ṭangṭi phu nih an laak i SAC ralkap 30 leng an tlaih hna, hriamnam tam ngai zong an laak kong thawng laaknak hrampi nih cun an chim.
Nizan June 11, zanlei suimilam 5:00 hrawng ah Sadone Byuha sakhan cu KIA hruai mi ṭangṭi phu nih an laak i Waingmaw—Kanpaikti lampi thluan um mi SAC ralkap sakhan ah minung an um ti lo, KIA nih pehzulh in kahdohnak an kalpi i Kanpaikti khuapi sakhan pakhat lawng a taang cang, tiah theih a si.
“Nizan June 11, zinglei suimilam 5:00 hrawng ah Sadone Byuha sakhan an laak i a zate ah sakhan 6 an laak, Waingmaw—Kanpaikti lampi ah SAC ralkap an um ti lo, Kanpaikti khuapi um sakhan pakhat lawng a taang cang, nihin i tlaih mi hi SAC ralkap, BGF le Pyituhsit 30 leng an si, hriamnam laak mi cu a tam ngaingai,” tiah KIA thawng laaknak hrampi nih an chim.
SAC Ti Ralkap Nih Rohingya Tilawng An Kah I Ngakchia Telh In Minung 40 Leng An Thi>>>>>>>>
SAC ralkap ti ralkap nih tilawng in Bangladesh ram ah i thlop ding in a kal mi Rohingya ralzaam pawl cu an kah hna i ngakchia telh in minung 40 leng an thih kong, Federation of Rohingya Community(FRC) nih an thanh.
Ngakchia tlawmpal telh in Rohingya ralzaam 40 hrawng a phurtu tilawng pakhat cu June 9, zan suimilam 10:00 hrawng ah Rakhine ramkulh, Maungdaw peng Maungni khua in Bangladesh ram ah i thlop ding in an kal minute 5 hnu hrawng ah ramri hngak SAC palik le ralkap pathum nih an dirter hna i Rohingya ralzaam pawl cu hramhram in Bangladesh tangka Taka 6,000 an hal hna. Cu tilawng cu meng hnih hrawng a kal hnu ah SAC ti ralkap nih pil lak in an kah, tiah theih a si.
“Hliam a tuar mi pathum an um i Maungdaw le Buthidaung ah an chiah hna, an zate hin Buthidaung le Maungdaw siizung an khar caah i thlop ding in Bangladesh ram an panhnak a si,” tiah FRC dirhtu U Nay San Lwin nih a chim.
SAC ti ralkap kahdoh ruang ah Rohingya nih an i cit mi tilawng cu a pil i nu pahnih le pa pakhat dah ti lo a dang cu an thi dih, a him mi pathum nih an chim ning ah cun tilawng pil ruang ah Rohingya ralzaam 40 leng an thi i a ruak cu Naf tivapi cung ah an vuan, tiah theih a si.
“A luat mi pathum nih hin tilawng thing nganpi zan khuadei an i tlaih i a thaizing zinglei ah Maungdaw thlanglei hmunram ah ti nih a phanhpi hna, cu hnu ah cun khuapi ah luhpi an si. Tilawng cung ah hin upa 35 an i tel i ngakchia zeizat an i tel fiang in theih a si rih lo, an zate hin minung 40 leng an si men lai,” tiah FRC dirhtu U Nay San Lwin nih a chim.
Leave a Reply