SAC nih hramhram nawlngeihnak an laak ni thawk in nihin tiang kum thum leng chung ah minung 5 nak tam, a bu in thahnawnak cu SAC ralkap nih voi 115 an tuah i sualnak ngei lo tualchung mi 1670 an thah hna, tiah National League for Democracy(NLD) nih an thanh.
“Hi bantuk thahnawnnak hi SAC ralkap rallam a sial mi nih an tuah pin ah vanlawng kahdohnak an tuah i bomb thlak, hriamngan kah le a nung bu meikhangh tiin tualchung mi an thahnawn hna. Atu i cazin kan laak mi hi cu mit in hmuh mi le fehter khawh mi lawng telh a si caah atu nakin thah a tong mi an tam kho,” tiah Sanchaung peng NLD party Vice Chairman nih a chim.
SAC nih hin miphun cihmih timhnak he ralkap phung cu hramhram in an buar i langsar ngai in an cawlcangh ruang ah SAC dantat khawhnak le mizapi nih tlukruannak kan hmuh khawh nakhnga NLD cu kan i zuam cuahmah, tiah an langhter.
SAC nih hramhram nawlngeihnak an laak kum thum leng chung ah SAC ralkap nih minung 5 nak tam a bu thahnawnnak voi 260 an tuah i sualnak ngei lo tualchung mi 2,490 an thah hna. Cu chung ah cun Sagaing ramṭhen hi thah a tong mi an tam bik a si, tiah kherhhlainak a tuahtu phu Nyan Lin Thit phu nih June 12 ni ah khan an thanh ve.
Malaysia Ah Chin Ralzaam Sianginn Cu Nawlngeitu Nih Luhhnawh In Siangcachim Nu 5 An Tlaih Hna>>>>>>>>>>>>
Malaysia ram, Seremban khuapi ah Chin ralzaam sianginn pahnih cu Malaysia ram nawlngeitu pawl nih luhnawh in chekhlatnak an tuah i Document tlamtling in a ngei lo mi Chinmi siangcachim 5 an tlaih hna, tiah Chin ralzaam zohkhenhtu phu in Chairman Paul Ngun Awi Thang nih RFA ah a chim.
“Tlaih a tong mi hi Chin ralzaam sianginn pahnih in an si i siangcachim 6, rawlchumtu le a fa tiin an zate minung 8 an tlaih hna i minung pathum cu thlah ṭhan an si nain siangcachim 5 tu cu an thlah rih hna lo. Luatnak an hmuh khawh nakhnga a lam kip in zuampiak an si i UNHCR Malaysia zung zong pehtlaihpiak an si pinah Malaysia ram nawlngeitu pawl zong an ceihmaipi hna,” tiah Paul Ngun Awi Thang nih cun a chim.
A luancia June 12 ni zong ah Malaysia ram Kuala Pilah pengkomh ah Document tlamtling in a ngei lo mi Myanmar mi 24 an rak tlaih cang hna kong, Malaysia Immigration zung nih an thanh.
RFA nih an khawmh mi cazin ning ah tukum kum hramthawk in May thla dongh tiang ah Malaysia ram Johor, Negeri Sembilan le Selangor ramkulh telh in hmun tampi ah Myanmar ram mi 1,000 leng tlaih an tong.
UNHCR Malaysia zung nih a luancia April thla dongh i an langhter mi cazin ning ah cun Malaysia ram in ram thumnak lei kal khawhnak a sok mi 190,000 an si i, cu chung ah cun 160,000 leng hi Myanmar ram mi an si.
Leave a Reply