Chinram, Matupi peng ah hrambunh in hriam a tlai mi CDF-Matupi Brigade-2 nih an hmunram chung ah duh paoh in Rakhine ralkap AA le a kuttang Chin Brotherhood an cawlcangh i kahdohnak an kalpi mi cu a rem lo an ti i an hmunram chung in chuak dih ding in nizan June 18 ah ralrin an pek hnanak cathanh an chuah.
Atu lio a linsa ngai mi Matupi khuapi kahdohnak kong ah hin Matupi peng hriamtlai phu hnih; CDF-Matupi Brigade-1 le CDF-Matupi Brigade-2 cu a luancia April 26 ni ah khan tonbiaruahnak an rak ngei i kahdohnak kalpi ding kong ceihmainak an ngeih mi ah CDF-Matupi Brigade-1 nih hin AA kuttang ah um in kahdohnak kalpi a rem an rak ti nain CDF-Matupi Brigade-2 nih an duh lo hnu ah Paletwa lampi lei SAC ralkap sakhan cu Brigade-1 nih ṭuanvo laak ding le Brigade-2 nih Hakha lam lei SAC ralkap sakhan ṭuanvo laak ve ding in kaphnih kar hnatlaknak an rak ngeih kong, CDF-Matupi Brigade-2 nih an langhter.
Kaphnih kar ṭha tein hnatlaknak an ngeih hnu ah CDF-Matupi Brigade-2 cu a luancia May 6 ni thawk in Matupi khuapi Khah-Lah-Yah 140 SAC ralkap sakhan le Byuha sakhan laak ding ah Chinland Council ralkap he kahdohnak kalpi ding in timhlamhnak an ngei cang i June 17 zan ah Phaneng khua i timhcia in an um hnu ah a zaam kho ve lo mi Phaneng khua mi tarnu tarpa 8 chanhchuah ding ah motor pakhat in an thlah mi Chinland Council ralkap pakhat cu AA le a kuttang Chin Brotherhood ralkap nih an rak tlaih ruang ah kaphnih kar buainak a chuah kong, CDF-Matupi Brigade-2 nih cun an langhter.
CDF-Matupi Brigade-2 nih cun, “AA hruai mi Chin Brotherhood nih ramri lonh in nan thil tuah mi hi ngol cang u law kahdohnak kan kalpinak hmun in a rannak in chuak dih cang u, Chinmi le Chinmi kar ah huatnak chuahter ding ah AA nan i sawm mi cu kan duh hrimhrim lo, cun kahdohnak kan kalpinak hmun in hnu nan tolh duh lo a si ahcun Chinland Council ralkap nih kan in kah cang hna lai,” tiah AA kuttang Chin Brotherhood ralkap pawl cu ralrin an pek hna.
Hi kong he pehtlai in Global Matu Organization(GMO) nih cun, “Hakha le Thantlang ah kahdohnak kalpi khawh a si ko lio ah CDF-Matupi Brigade-1 le Chin Brotherhood nih kahdohnak an kalpi cuahmahnak Matupi khuapi chung theng ah ra in hnahnawhnak le buainak a rak chuahtertu CNF/CNA, Chinland Council le ṭangṭi phu cu a rannak in CDF-Matupi Brigade-1 hmunram in chuak colh u, nan chuah duh lo a si ahcun thisen a luang mi vialte ṭuanvo laak nan hau sual lai,” tiah nizan June 18 ah an langhter ve.
Chinland Council Ralkap Ṭangṭi Phu Nih Matupi Khuapi Chung Kahdohnak An Kalpi Mi Ah Hnahnawhnak Pek Lo Ding In Nawlnak An Tuah>>>>>>>>>>>>
Chinram, Matupi khuapi chung penguk zung SAC ralkap sakhan cu Chinland Council ralkap ṭangṭi phu nih a luancia May 30 ni ah an laak hnu ah Matupi khuapi SAC ralkap Khah-Lah-Yah 140 sakhan le Byuha sakhan cu pehzulh in an kah ṭhan i kahdohnak an kalpi lio ah Rakhine ralkap AA hruai mi Chin Brotherhood ralkap nih Phaneng khua le Khah-Lah-Yah 140 SAC ralkap sakhan kar ah hnahnawhnak an pek hna ruang ah kaphnih kar kahdohnak a chuah kong Chinland Council nih nihin June 18 ah an thanh i atu i kahdohnak an kalpi cuahmah mi ah hnahnawhnak pek ti lo ding in Chinland Council nih cun ralrin peknak an tuah.
Chinland Council nih cun, “Chinland Council ralkap le ṭangṭi phu nih Matupi peng Khah-Lah-Yah 140 SAC ralkap sakhan le Byuha sakhan laak ding in a lam kip in kan i zuam cuahmah lio ah nizan June 17 ni ah Rakhine ralkap AA hruai mi Chin Brotherhood ralkap pawl nih Matupi khuapi chung i aa hreng mi tualchung mi hna ṭhialkam ding in ṭuanvo pek mi Chinland Council ralkap pakhat cu a ruang um lo in an tlaih pin ah kahdohnak kan kalpinak hmun Khah-Lah-Yah 140 SAC ralkap sakhan le Phaneng khua kar ah kahdohnak kalpi kho lo ding in hnahnawhnak a kan pek ruang ah kaphnih kar i kahdohnak tiang a chuak,” tiah an langhter.
Chinram luatnak ding ca ah thazaang chuah in kahdohnak a kalpitu Chinland Council, Chinland cozah Defence Ministry tang ah a um mi CDF-Matupi Brigade-2 telh in ṭangṭi phu nih kahdohnak a kalpinak hmun ah Rakhine ralkap AA hruai mi Chin Brotherhood ralkap nih hnahnawhnak kan pe ti hlah u law Chinland Council ralkap ṭangṭi phu nih Khah-Lah-Yah 140 SAC ralkap sakhan le Byuha sakhan cu a rannak in laak kan i zuam lai, tiah Chinland Council nih an thanh mi ah an langhter.
Hi kong ah hin AA hruai mi Chin Brotherhood ralkap nih cun, “Kan ralkap hna nih nunnak pek in le hliamtuar bu in Matupi khuapi chung Khah-Lah-Yah 140 SAC ralkap sakhan le Byuha sakhan pehzulh in kan kah lio ah CNF/CNA le a kuttang ralkap hna nih ruahlopi in an kan kah i atu ah cun SAC ralkap le CNF/CNA hruai mi ralkap karceh in kan um caah Chin Brotherhood le ṭangṭi phu nih kan kah ve hna,” tiah an langhter ve.
Leave a Reply