Chinram chaklei, Tedim peng chung um ZFU/PDF-Zoland nih an rak laak mi Kannedy tlang SAC ralkap sakhan cu SAC ralkap 100 leng nih an laak ṭhan kong, thawng laaknak hrampi nih an chim.
Nihin June 18, zinglei suimilam 3:30 hrawng ah Tedim—Kalay motor lampi kam ah a um mi Kannedy tlang sakhan cu SAC ralkap 100 leng nih fuhpanh in an kah i suimilam 2:30 chung kaphnih kar kahdohnak a chuah hnu ah hnu an tolh kong, ZFU/PDF-Zoland in ṭuanvo ngei pakhat nih a chim.
“SAC ralkap pawl cu tuzing suimilam 3:30 hrawng ah khan thazaang tam ngai in an ra i zinglei suimilam 5:30 tiang hrawng kan kah hna, SAC ralkap lei in thi le hliam an um, kanmah lei tu cun thi le hliam um lo in hnu kan tolh,” tiah ZFU/PDF-Zoland in ṭuanvo ngei pakhat nih cun a chim.
SAC ralkap pawl cu June 16 zinglei ah Tedim khuapi in Tedim—Kalay lampi cung Kennedy tlang sakhan lei ah ke in rallam an sial i voi khat lo ah Taingen sakhan zong hi an kah ṭhan khawh, tiah kahdohnak kong a tuaktan thiam mi hna nih an zumh.
Kalay—Tedim motor lam lam ah a um mi Kannedy tlang SAC ralkap sakhan cu a liamcia 2023 November 21 ni ah ZFU/PDF-Zoland nih an laak i Major pakhat telh in SAC ralkap 13 an rak tlaih hna. A luancia June 15 zinglei ah Tedim—Kalay motor lampi zulh in Kalaymyo in motor pathum a kai mi SAC ralkap pawl cu Taingen khua an phan rih lo, tiah People Defence Army(PDA) in ṭuanvo ngei pakhat nih a chim.
“Taingen lei ah a kai mi SAC ralkap pawl cu Kalaymyo he meng thum hrawng aa hlatnak Mualpi khua an phanh ah ramtang in ke in rallam an sial i Chin hriamtlai ṭangṭi phu nih an rak laak mi Taingen sakhan laak i tim in kahdohnak kalpi an i timh zumh a si,” tiah People Defence Army(PDA) in ṭuanvo ngei pakhat nih cun a chim.
Matupi Khuapi In Ral A Zaam Mi Hna Ca Ah Zuaral In Bawmhnak Pek A Herh>>>>>>>>>
Chinram, Matupi khuapi kahdohnak ruang ah khuapi chung um mi tualchung mi cu khuapi chuahtak in a himnak hmun kawl in an zaam hna i a cheu cu Mindat peng le Matupi peng khuate lei ah an zaam hna, a cheu cu Mizoram ah a zaam mi zong an um. A hlei in Mindat peng chung i a zaam mi hna cu rai nih a phanh ve hna caah zualral in bawmhchanh an herh ngaingai, tiah theih a si.
Matupi khuapi chung in Matupi peng ralzaam buuk ah a phan mi tualchung mi hna cu 1,500 hrawng an si i a ra chap mi ralzaam cazin cu ṭuanvo ngei nih an khawmh cuahmah. Mindat peng chung ah a zaam mi hna hi atu lio ah a tam ngai mi chungtlik zawtnak nih a tlunh hna i Matupi peng chung ah a zaam mi hna zong khuacaan aa thlen liopi a si ruang ah cumpi, hromfah, khuasik le raifanh in an zawt hna caah zualral in sii-ai le i thlopbulnak bawmhchanh an herh ngaingai, tiah theih a si.
Atulio Matupi peng chung ralzaam hna ca ah zualral in Tarpaulin, khiangthawng, ek-kheng, eidin tirawl, chiti, cite le sii-ai bawmhchanh an herh ngaingai caah ram chung ramleng um mi mizapi cu kutsamh cio ding in nawlnak an tuah.
Leave a Reply