Chin National Army (CNA) ralbawi Lieutenant Colonel Lal Bik cu ralram hmun pakhat kahdohnak ah a nunnak a liam, tiah amah he naihniam in a um mi hna sin in theih a si.
Lt. Col Lal Bik cu Arakan Army (AA) le Chin Brotherhood kut in a nunnak a liam, tiah cheukhat sin in thawng kan theih nain thil sining fiang tein kan thanh kho lo. Hi kong he pehtlai in CNF/CNA zong pehtlaihnak kan tuah kho rih lo.
A luancia June 18 ah CB le AA nih an rak tlaih mi Chinland ralkap Salai Ram Thang zong a thi cang, tiah theih a si.
Matupi Ah Kahdohnak A Fah Caah Khuapi Luhchuahnak Lampi An Phih Dih Kong CDF-Matupi Brigade-2 Nih Thanh>>>>>>>>
Chinram, Matupi khuapi ah SAC ralkap sakhan laak ding ah Chinland Cozah, Defence Ministry hruainak tang ah a um mi CNA le CDF ṭangṭi phu nih timhlamhnak an ngeih caah Matupi khuapi luhchuahnak lampi vialte ni rikhiah um lo in an phih dih kong, CDF-Matupi Brigade-2 nih an thanh.
CDF-Matupi Brigade-2 nih Matupi—Paletwa lampi, Matupi—Kantaung lampi, Matupi—Hakha lampi le Matupi—Lailenpi lampi cu ni rikhiah um lo in nihin June 20 ni in an khar. Ṭha tein thawngthanh mi zul duh lo in nawl a ngai lo mi paoh cu fak piin dantat an si lai i hriamtlai phu dang nih an zulh duh ve lo ahcun kahnak nawl kan ngei, tiah CDF-Matupi Brigade-2 nih cun an langhter.
Matupi khuapi cu a ningpi laak khawh nakding ca ah Rakhine ralkap AA hruai mi Chin Brotherhood ralkap le Chinland Council ralkap tiin hmun hnih ah kahdohnak kalpi a si i, AA le ṭangṭi phu nih a luancia June 17 ni ah khan Khah-Mah-Yah 304 SAC ralkap sakhan an laak. Kamkhat lei ah Chinland Council ralkap CNA/CDFs ṭangṭi phu nih Khah-Lah-Yah 140 SAC ralkap sakhan le Byuha sakhan laak ding ah kahdohnak an kalpi cuahmah, tiah theih a si.
Tedim Peng, Taingen Sakhan Cu SAC Ralkap Nih An Laak Ṭhan>>>>>
Chinram, Tedim khuapi le Kalaymyo kar ah a um mi Taingen SAC ralkap sakhan cu Chin hriamtlai ṭangṭi phu nih an rak laak khawh cang nain nizan June 20 ah SAC ralkap nih an laak ṭhan kong, tualchung mi nih an chim.
A luancia June 16 ni ah khan Tedim khuapi in SAC ralkap 100 hrawng cu khuate lei in rallam an sial i June 17 ni ah ZFU/PDF-Zoland he an i kah hnu ah ZFU/PDF-Zoland nih hnu an tolhtak hna i Kennedy tlang sakhan zong June 18 ni ah an laak khawh, nizan June 20 ni ah Taingen sakhan cu an laak chap, tiah theih a si.
Tedim—Kalaymyo kar i a um mi Taingen sakhan ah cun rallam sial mi SAC ralkap le CDF CDM Siyin cu nizan June 20 ni ah an i kap nain SAC ralkap pawl an thazaang a tam deuh caah CDF CDM Siyin nih hnu an tolhtak hna i SAC ralkap nih Taingen sakhan cu an laak khawh ṭhan, tiah tualchung mi nih an chim.
Atu lio kahdohnak ruang ah Kalay—Taingen—Tedim lampi cung ah a um mi Zozang, Aaluai, Taingen, Hingzing le Suahling khua tualchung mi cu a himnak hmun kawl in an zaam dih hna, tiah theih a si.
SAC ralkap nih an laak ṭhan mi Kennedy tlang sakhan cu PDF Zoland nih a liamcia 2013 November 23 ni ah an rak laak i tukum kum hramthawk January 16 ni ah khan Chin hriamtlai ṭangṭi phu nih Taingen sakhan an rak laak ve nain thla 5 tluk a rauh hnu ah SAC ralkap nih an laak ṭhan.
Leave a Reply