Magway ramṭhen, Ngape peng, Manchaungse pawng kahdohnak ah SAC ralkap 20 an thih kong, Chin Defence Force – Asho nih nizan June 22 ah an thanh.
Chin Defence Force – Asho(CDF-Asho), People’s Defence Force – Ayeyarwaddy(APDF) ṭangṭi phu nih June 21, zinglei suimilam 5:30 ah Ngape peng, Manchaungse pawng Kyaungkone khua hlun SAC ralkap sakhan cu an kah i suimilam 2 chung kaphnih kar kahdohnak a chuah hnu ah SAC ralkap nih hriamngan le vanlawng in kahdohnak an tuah caah sakhan la manh lo in hnu an tolh kong, Chin Defence Force – Asho nih an langhter.
Ngaphe peng kahdohnak ah cun Chin Defence Force – Asho(CDF-Asho), People’s Defence Force – Ayeyarwaddy(APDF) ṭangṭi phu nih SAC ralkap 20 a hmun ah an hrilh hna i minung tam ngai an hliamh hna kong, CDF-Asho nih an cathanh chuah mi ah an langhter.
Kahdohnak A Fah Caah Taingen Lampi Hman Rih Lo Ding In CDF CDM Siyin Nih Mizapi Theihternak Tuah>>>>>>>>>>
Chinram, Tedim peng, Taingen le a kiangkap ah SAC ralkap le Chinland Council ralkap kar kahdohnak a fah caah caan rikhiah um lo in Taingen lampi hman rih lo ding in CDF CDM Siyin nih nihin June 22 ah mizapi sin theihternak an tuah.
CDF CDM Siyin nih cun, “Zeitik caan paoh ah kahdohnak a chuah khawhnak Taingen lampi ah SAC ralkap nih sualnak ngei lo tualchung mi tlaih in an motor le motorcycle he hramhram in ralphaw ah hmang in i vennak ah an hman hna caah Taingen lampi cu kan khar ṭhan cang. Mizapi nih thawng kan thanh mi zul in lampi hmang lo in ralring tein um i zuam cio u,” tiah an thanh.
Taingen khua sianginn le thlacamnak tlang (Bethel) ah hin SAC ralkap pawl umhmun khuar in an um rih i Chinland Council ralkap he i kahdohnak ah SAC ralkap lei in thi le hliam an tam ngai cang kong, kahdohnak kong a thei mi hna sin in theih a si.
Matu Social Organization(MSO) Nih Matupi Khuapi Kahdohnak Ah AA Ralkap An I Tel Mi Duhlonak An Langhter>>>>>>>
Chinram thlanglei Matupi khuapi ah Chinland Council ralkap le AA hruai mi Chin Brotherhood cu i hmuhthiam lonak ruang ah mah le mah kar ah fak ngai in an i kap i, kaphnih in thi le hliam zong an um cang caah hi kahdohnak ah hin AA aa thlak ve mi cu Matu Social Organization(MSO) nih an cohlang lo i duhlonak cathanh an chuah.
Matu Social Organization(MSO) hruainak in a luancia June 20 ni ah khan Malaysia ram a phan mi Matupi mi cu tonbiaruahnak an ngei i, “Chinland Council ralkap le Chin Brotherhood ralkap kar buainak le thisen tiang i chuahnak cu Malaysia a phan mi Matupi mi nih fak piin duhlonak kan langhter, CC le CB kar ah pehzulh in kahdohnak tuah ti lo in remdaihnak lam kawl in ceihmainak he a phichuak kawl tu i zuam hram u,” tiah MSO nih an langhter.
Matu Social Organization(MSO) hruainak in tuah mi Malaysia phan mi Matu mi tonbiaruaknak ah cun Chinram, Matupi khuapi kahdohnak i Arakan Army(AA) ralkap an i tel ve mi kong ah AA ralkap cu Matupi hmunram chung in chuak ding in le kahdohnak ah i tel ti lo ding in mi tam deuh an hna a tlak kong, an langhter chih.
Leave a Reply