Matupi Ah AA Kut In Nunnak A Liam Mi J. Hmangaihthanga Ruak Cu Rihkhawdar Phanhpi A Si Cang

Thechinstar || 23 June 2024

Nizan June 22, Matupi ral hmunram ah AA le ṭangṭi kut in a thi mi CDF-Hualngoram ralkap J. Hmangaihthanga ruak cu nihin June 23 zanlei suimilam 6 hrawng ah Rihkhawdar phanhpi a si cang.

J. Hmangaihthanga ruak hi khuami le ram ca ah a ṭuanpi ralkap hna nih sunglawi ngai in an don. A ruak hi tuzan ṭhutpi a si lai i, thaizing zinglei suimilam 8 ah vuinak caan tuah a si lai.

Nunnak a liam mi J. Hmangaihthanga hi volleyball bengh a thiam ngai mi a si i, Mizoram volleyball bengh zuamnak sang cem, Mizoram Pro Volleyball League ah team pali aiawh in aa celh kho mi a si pinah min ngei pakhat a si. Mizoram Volleyball Association lei zong nih a member hawi thihnak kong ah ngaihchiatnak cathanh an chuah.