Matupi Operation Ah AA+CB le CC Ralkap I Kahnak Ah A Thimi le Hliamtuar Mi An Tampi

Chinram Matupi Operation ah AA+CB le CC Army Ikahnak ruangah a thimi le hliamtuar mi an tampi tiah theih a si. June 18 in ni 20 tiang, nithum chung bak AA+CB le CC army kar ikahnak a chuak.A thimi le hliamtuar mi an um veve tiah CDF-Matupi Brigage I, biachimtu Ko Bawi Uk nih a chim.

“Kap hnih in mah le an kap veve caah Military Council teinak ding cu a harsa kho men. Brigade 2 nih lam khar dingin nawl an chuah fawn. Ralthuam le eidin izalhnak le lakluhnak a fumter lai. Chin Brotherhood pawl nih kan target Military Council kah kan timhmi zong a tlaiter lai. Kan ruahnak leng in nunnak a liammi kan tamte lai” tiah a chim chih.

Chinland Council ralkap le AA+ Chin Brotherhood pawl ikahnak ruangah June ni 20 ahkhan CNA Lt.Col Lal Bik a nunnak a liam ti thawng kan theih cang.

June 18 i CC le AA+CB ikahnak ahhin CB lei minung 2 an nunnak a liam. Hliamtuar tampi an um ti thawng theih a si. A thimi le hliamtuar mi zat theihfian a si lo tiah CDF Matupi Brigade I, biachimtu Ko Bawi Uk nih June ni 20 ahkhan Brotherhood Press Conference ah a chim.

Matupi Operation ah Chin Revolution veve I kahnak ruangah Military Council ralkap pawl an idin rih tiah theih a si. Tu ahhin Chinland Council ralkap hna nih Matupi khua hi lak hrimhrim an itimh caah ralthuam an ipechan thluahmah tiah Brigade I, biachimtu Ko Bawi Uk nih a chim.

Matupi Operation hi CB pawl nih June ni 9 in tukdoh hram an rak thok i, June 11 ahkhan khuachung an lak khawh, June ni 17 in Khah Mah Yah 304 battalion an lak tthan tiah theih a si. Matupi khua ikahnak ahhin CDF-Matupi Brigade 1, i ralkap minung 6 an nunnak a liam tiah theih a si