SAC Ralkap Nih Hakha Khua Mipi Inn An Khangh, HTBC Biakinn Cung Ah Hriamngan A Tla>>>>>>>>>>

Thachinstar | 2024 June 25 — Chin ramkulh, Hakha khua ah SAC ralkap nih Hakha, Hakha thar sang um mipi inn an khangh tiah theih a si.

June 25 zinglei sml 2:00am hrawng ah SAC ralkap pawl nih atu bantuk in Hakha khua, Hakha thar sang mipi inn an khangh hi a si i Believer Church Quarter chung inn telh in mipi inn 3 a ciam tiah Hakha khuami pakhat nih The Chinland Post ah a chim.

“Dei lei sml 2:00am hrawng ah an khangh hi a si i a hmuh cu an hmu manh hna lo. Inn a kang i mei a ceu hnu lawng ah an va zuanhhnawh hna. Inn 3 a ciam i adang 7/8 hrawng a tlaih ding a si ko nain khuami hna nih mei an thah dih manh” tiah a chim.

Hakha khua, Hakha thar sang, lam 6 tonnak ah a um mi SAC ralkap gate cu Chin hriamtlai phu hna nih an kah caah atu bantuk in SAC ralkap nih Hakha thar sang mipi inn an khangh hi a si tiah adang khuami pakhat nih The Chinland Post ah a chim ve.

“Lam 6 tonnak ah a um mi SAC ralkap gate cu June 24 zaan sml 10:00pm hrawng ah Chin hriamtlai phu nih an kah hna. Kahdohnak hi sml 1 hrawng a rau. Hakha hrambunh IB 266 nih hriamngan in voi 5 hrawng kah a bawmh hna, IB 266 nih a kah mi hriamngan cu HTBC biakinn cung ah a tla nain a puak lo” tiah a chim.

A luancia May 20 zong ah lam 6 tonnak ah a um mi SAC ralkap gate cu Chin hriamtlai phu nih an rak kah hna i culio kahdohnak chung ah SAC ralkap nih kah mi meithal kuan nih hngakchia pakhat a ban le a phei ah an rak hliam.