Matupi in CNA hruaimi ralkap pawl kan dawi dih cang hna tiah Rakhine hriamtlai AA hruaimi Chin Unau Phu nih thawng an thanh nain CNA lei nih cun Matupi kan chuahtak lo, tiah an chim ve.
Chin Unau Phu aa ti mi CNDF, PDF-Zoland, MDF, CDF-Mindat, CDF-Kanpetlet le CDF-Matupi Brigade (1) nih June 25 ah cathanh an chuah i, CNA hruaimi ralkap pawl cu hmun an kharnak Phanai le Ngalai khua in June 24 zaanlei ah kan dawi dih cang hna, tiah an langhter.
Hi kong he pehtlai hin CNF/CNA chimnak nawlngei Salai Htet Ni nih cun Matupi in zeitik hmanh ah hnu kan i thawn lai lo, tiah online biaruahnak ah a chim.
Salai Htet Ni nih, “Matupi ah AA he kan i kahnak in zeitik hmanh ah hnu ah kan i thawn lai lo. Atu zong ah micheukhat nih kan Chin ralkap a kir dih cang an ti. A si naisai lo. Chin unau le unau an i kap an ti fawn. Cucu a si lomi a si. An i bochanmi AA an sawm hna caah AA he kan i kap. AA he i kah hi kan duh ruang zong ah a si lo, i kah lo awk a ṭhat lo caah a si,” tiah a chim.
CNA hruainak in kalpi mi Matupi Operation hi a dih rih lo, aa thawk ka lawng a si rih tiah a chim chap.
Salai Htet Ni nih, “Matupi Operation hi a dih rih hrimhrim lo. Aa thawknak a si kan ti khawh. Cucaah, kan mipi hna, hi kong ah hin kan lungdong hrimhriam lai lo. Kan ramchung ah a rak lutmi ralhrang le kanmah doh ding in a rami vialte hi kan doh ding a si. Zeicahtiah, hihi kan ram a si. Chin miphun kan si, kan ramchung a si.
A dongh tiang kan doh lai a dongh tiang kan dir lai kan ti cang hnu cun, hi kan operation hi, mah nakin a faak deuhmi zong a ra lai,” tiah a chim.
AA siseh, kanram chung ah AA a rak hruaitu si hna seh, kan Chin ralkap thisen le nunnak vialte ca ah ṭuanvo an ngei, tiah Salai Htet Ni nih a chim chap.
Rakhine Lei ah Thilri Luhpi lo Ding in CYLA nih Biatak te in Ṭuanhma a Laak>>>>>>>
Mizoram, Lai khualipi Lawngtlai District chung in Rakhine lei ah eidin tirawl le datsi luhpi ti lo ding in CYLA nih biatak te in ṭuanhma a laak cang, tiah thawng kan theih.
AA nih Chinram ah Chin miphun hna he kahdohnak a tuah ruang ah le Lawngtlai District chung ah ralzaam a si lo mi Rakhine pawl ralhriam he an lut lengmang ti mi ruang ah CYLA nih June 24 thawk in Rakhine lei chawlehthalnak lam a phih hi a si.
CYLA nih, “Langtlai in Rakhine lei ah an luhpi mi eidin tirawl nih Rakhine mizapi ca ah thathnemnak a chuahpi tiah kan ruah lio ah khuachak lei kan Chin unau hna he an i kap. Hi eidin an laak mi zong hi Arakan Army an thazaang ṭhawnnak ca ah an hman ti kan theih. Hi bantuk hi cu a ṭha lo ngai tiah kan ruah,” tiah a langhter.
Cun, AA pawl hi Chinmi he i kahnak ngol ding in voi tampi kan nawl hna nain bialehnak a um lo. Kan ramchung zong ah hriamnam i put in an lut ṭheo, tiah CYLA nih a langhter chap.
Lawngtlai in Rakhine lei chawlehthalnak lam phih a si hnu ah CYLA mino pawl nih chunzaan in checknak an tuah cuahmah i, Rakhine lei thilphor motor tampi zong an kirter cang hna.
Cu lawng si loin ralzaam a si lo mi Rakhine pawl hriamnam he Lawngtlai District ah an luh mi kong he pehtlai in Lawngtlai District chung khua le sang le veng kip ah YLA ṭuanvo ngeitu hna nih chekhlatnak tuah ding le June 30 hlan ah CYLA ah report pek ding theihternak a tuah fawn.
Atu bantuk in CYLA nih biatak te in ṭuanhma a laak mi kong he pehtla in CYLA Information Secretary Lal Pui Lian Thangnget nih, “Atu bantuk hin ṭuanhma kan laak mi hi khuachaklei Laimi kan unau hna dohthlennak ah kan i telpi hnanak a si ve ti hi rak kan theihpi ve hram u,” tiah a chim.
Leave a Reply