PNLA Nih Hsihseng Um SAC IB 424 An Lak>>>>>>

HsiHseng peng um SAC IB 424 cu PNLA le a hawikom phu nih an laknak muicawl cu June 26 ah an langhter.
PNLA nih SAC ralkap cu tukum January thla zarhthumnak thawk in kah hram an thawk hna i January thladongh lei ah Hsihseng peng um SAC IB 424 cu tlamtling tein an lak khawh i hriam le kuanzen tampi zong an rak lak khawh.

PNLA nih Hsihseng khua an lak hnu ah SAC nih vanlei, hriamngan leng ah Drone pawl hmang in a doh ṭhan ve hna caah PNLA nih an laknak hmunhma cu hnu an kir tak ṭhan.
Cucaah nihin tiang Hsihseng peng ah kahdohnak a chuak peng rih tiah PNLA nih an thanh. June 24 zong ah Hsihseng peng Htisung khua lei ah SAC ralkap le PNO pawl an rak luh caah kahdohnak a fak, SAC lei hriamngan an kah mi nih mipi inn cheukhat a hrawh tiah an langhter fawn.
SAC ralkap an doh ṭhan hnu thawk in nihin tiang thla 5 chung ah SAC ralkap he kahdohnak voi 130 hrawng a chuak i SAC lei 400 leng an thi, Major rank telh in SAC lei 40 hrawng a nung in an tlaih hna tiah PNLA cathanh ah hmuh khawh a si.

Nihnih Chung Ah TNLA Nih SAC Ralkap Sakhaan 24 A Lak>>>>>>>>

SAC ralkap sakhaan 24 cu June 25-26 ni 2 chung ah an lak khawh i SAC ralkap 17 nih hriam chiah in a sung an pek tiah TNLA nih June 26 zaan ah cathanh a chuah.
Shan ram chaklei, Nawnghkio, Kyaukme, Mogok, Mongmit le Hsipaw khua um SAC ralkap sakhaan pawl cu “Operation 1027” a pehzulh tertu kahdohnak in an lak hna hi a si i kuanzen tampi zong an lak khawh tiah an thanh.

Kahdoh a fahnak Kyaukme khuachung, June 26 chun sml 1:00pm hrawng ah SAC ralkap lei kah mi hriamngan a tla i a puah caah chungkhar minung 4 an thi i adang mipi 7 zong an i hliam tiah an ṭial chih.
June 25 zong ah Kyakme peng ah hriamngan a tlak caah mipi 2 an thi i 4 an rak i hliam.

TNLA Phufonh Nih Kyaukme Palek Sakhaan An Lak>>>>>

Shan ram chaklei, Kyaukme um Myoma palek sakhaan cu June 26 zinglei ah TNLA hruai mi dothlennak phu pawl nih an lak khawh i sakhaan bawizik zong a nung in an tlaih Khit Thit nih a langhter.
Cun Kyaukme khua um SAC ralkap hriamngan sakhaan No. 352 le sakhaantha hna ah kahdohnak a fak, June 26 zinglei sml 5:47am hrawng ah Kyaukme khua, Sakhaantha tlang ah siseh, sml 6:30am hrawng ah No. 352 hriamngan ralkap Battalion umnak zong ah kahdohnak a chuak tiah theih a si.
SAC ralkap le TNLA karlak ah Mogok, Nawnghkio, Kyaukme, Hsipaw hna ah June 25 thawk in kahdohnak a chuak ṭhan tiah Khit Thit sin in thawng theih a si.