Shan ramkulh chaklei, Nawnghkio peng ah TNLA nih an laak mi Khah-Mah-Yah 115 SAC ralkap sakhan ah hriamnam 380 leng le ralkap hman mi thilri tam ngai an laak kong, TNLA nih an thanh.
June 25 le June 26 ni ah Nawnghkio khuapi Khah-Mah-Yah 115 SAC ralkap sakhan cu TNLA le MDY-PDF ṭangṭi phu nih an laak i sakhan cung SAC ralkap hriamnam 380 leng an laak, tiah theih a si.
June 26 ni ah Nawnghkio khuapi Kantkaw SAC ralkap sakhan le sakhan dang ah hriamnam 50 leng cu TNLA le MDY-PDF ṭangṭi phu nih an laak. Cu pin ah SAC ralkap 17 cu hriamnam 50 leng i put in TNLA sin ah an i ap, tiah theih a si.
Hakha Khuapi Khuathar Sang Ah Minung 5 Cung A Bu In Um Khawh A Si Lo, Tiah Nawl Chuah Mi Cu SAC Nih An Hnon Cang>>>>>>>>
Chinram, Hakha khuapi, Khuathar sang chung ah minung 5 cung a bu in um khawh a si lo tiah SAC nih nawl an rak chuah mi cu SAC nih an hnon ṭhan cang i atu ah cun pumhkhawmh le thlacamnak tibantuk tuah khawh a si cang, tiah theih a si.
A luancia June 23 ni thawk khan minung 5 cung a bu in um khawh a si lo, tiah nawl chuah mi cu SAC nih an hnon cang nain Khuathar sang chung i chawdawr an kharter mi hna tu cu a ra lai mi August 20 tiang kharpiak rih an si lai, tiah Khuathar sang um mi pakhat nih a chim.
A luancia April 12 ni ah khan Hakha khuapi ah SAC kuttang Minister pawl nih an i cit mi motor cu CDF-Hakha nih Drone in bomb an rak thlakhnawh hnu in “chawdawr le Biakinn ah humhimnak an la” tiin khuathar sang chawdawr cu SAC nih an kharter hna i minung 5 cung a bu um lo ding tiah April 22 ni ah nawl an rak chuah.
Hi kong ah hin SAC nih cun a luancia June 7 ni ah khan Hakha khuanu khuapa le Pastorte cu Chin nunphung ning tein, saram thisen luanh in ngaihthiam hal ding in an rak ti hna i cu hnu lawng ah nawlchuah mi hnonpiak ding in an rak ti hna nain Chin nunphung ning in i lenkainak a um lo, tiah theih a si. Hakha khuapi ah hin a bu in tuah ding mi thil kong le pumhkhawmh kong ah atu tiang SAC sin ah theihternak tuah hmasa a hau, tiah theih a si.
Hakhathar Ah Innlo Chuahtak Lo Ding In HYO Nih Mizapi Sin Nawlnak An Tuah>>>>>>>>
Chinram, Hakha khuapi ah a luancia ni tlawmpal chung ah SAC ralkap le CC ralkap kar kahdohnak a chuak mi ruang ah innlo chuahtak lo ding in nihin June 28 ah Hakha Youth Organization(HYO) nih mizapi sin nawlnak an tuah.
“Kan hnulei te ah a cang mi kahdohnak ruang ah inn le lo chuahtak tim hlah usih. Kan inn le kan lo, kan dum kan hau kanmah nih kan i kilven lo ahcun ahohmanh nih an kan venpiak lai lo i a um ding tu kan um lo ahcun a um lo ding midang tu kan inn le kan lo ah an um sual lai.
Kahdohnak hi kan hawile zong nih hrial khawh chung an kan hrialpiak mi a si ko. Hakha khuapi chung biatak tein kah le lak an timh hlan cu kan inn le kan lo kanmahte nih hngak rih ko hna usih. Ṭhial le kaam kan hauh tik ah cun thawngthanh cio khawh tu kan i zuam te hna lai,” tiah Hakha Youth Organization(HYO) nih an thanh mi ah an langhter.
A luancia June 24, zanṭim suimilam 2:00 hrawng ah khan Hakha khuapi, Hakhathar sang lam ruk tonnak Gate ah umhmun a khuar mi SAC ralkap le Chinland Council ralkap an i kap i, cu zan lila ah cun SAC ralkap nih khuachung ah datsi toih in inn thum ciam dih in an khangh, tiah theih a si.
Leave a Reply