Karen ramkulh, Karen National Union (KNU) nih a uk mi hmunram thla 6 chung kaphnih kar kahdohnak ah SAC ralkap 1,903 an thi i minung 1,275 hliam an put kong, Central KNU nih an chim.
KNU nih an uk mi hmunram chung ah umhmun khuar aa tim mi SAC ralkap pawl cu KNLA le KNDO ṭangṭi phu nih an kah hna i thla 6 chung ah kaphnih kar kahdohnak voi 1,827 a chuak mi ah SAC ralkap 1,903 an thi i minung 1,275 hliam an pu, tiah theih a si.
KNU hmunram chung kahdohnak ah cun KNLA le KNDO ṭangṭi phu in ralkap 81 nih ram le miphun ca ah nunnak an pek i minung 198 nih hliam an tuar ve, tiah theih a si.
Laukkai Kahdohnak Ah Ṭuanvo Pek Mi Operation Command Headquarters I Major General Zaw Min Cu Thihdan An Pek>>>>>>>>>
Shan ramkulh chaklei, Laukkai hmunram chung kahdohnak ah ṭuanvo rak pek mi Operation Command Headquarters i Major General Zaw Min cu SAC nih thihdan an pek kong, Naypyidaw ral lei thawng laaknak hrampi nih an chim.
A luancia March thla chung ah khan Online in tangka hlen kong he pehtlai in Major General Zaw Min, Deputy Defence Minister Major General Aung Lin Tun, Eastern Command Commander Major General Hla Moe le Nothern Command Commander Major General Soe Hlaing cu an tlaih hna i May thla chung ah Zaw Min telh in Major General pawl cu thongthlak an si pin ah an ngeih mi thil vialte an chuh dih hna. China lei nih halnak an tuah bantukin July thla hramthawk ah Major General Zaw Min cu SAC nih thihdan an pek i Daik-U thonginn ah an kuat, tiah theih a si.
A luancia January 4 ni ah SAC ralkap le an chungkhar zate minung 4,000 leng cu MNDAA sin ah hriamnam chiah in an rak i ap hnu ah SAC nih Major General le Brigadier General pathum cu SAC nih thihdan a pek cang hna i July thla hramthawk ah Major General Zaw Min zong SAC nih thihdan an pek ve. Zaw Min he tlaihṭi mi Deputy Defence Minister Major General Aung Lin Tun, Eastern Command Commander Major General Hla Moe le Nothern Command Commander Major General Soe Hlaing zong kum 1-15 kar thong thlak ding in SAC nih bia an khiahpiak ve hna, tiah theih a si.
Chinland Defense Force – Zophei In Ralkap Pakhat Nunnak A Liam>>>>>>>>
Chinram, Thantlang peng, Zopheiram chung ah hriam a tlai i pau dohthlennak ca ah biatak tein a cawlcang mi Chinland Defense Force – Zophei in ralkap pakhat a nunnak a liam, tiah theih a si.
CDF-Zophei in Lieutenant Corporal Salai Van Ceu Hnin(kum 20) cu hramhram in nawlngeihnak latu SAC ralkap kahdohnak, hramhram uknak hrawh ding, mizapi runven ding le Federal Democracy rampi ser khawh nakding in ral a tuk cuahmah lio nihin July 12 ah Chinram thlanglei Matupi Operation kahdohnak ah ram le miphun ca ah a nunnak a pek.
“Ram le miphun ca ah na nunnak tiang na pek caah CDF-Zophei nih upatnak sang bik kan in pek. Na kaltak mi na chungkhar le hawikom vialte an ngaihchiatnak kan i hrawm ve. Na thisen le nunnak na pek mi cu kan ram le miphun luatnak ca ah si hram ko seh,” tiah CDF-Zohphei nih ngaihchiatnak cathanh an chuah.
Leave a Reply