Breaking News : Hmawbi Ah SAC Helicopter Pakhat A Tla, Southern Command Air Force Commander, Major General Soe Tin Lat Le A Bawmtu Pakhat An Thi
Thechinstar || 2 August 2024
Yangon khuapi, Hmawbi khuapi ah SAC Helicopter pakhat a tla i Southern Command Air Force Commander, Major General Soe Tin Lat le a bawmtu pakhat an thi i vanlawng khal nu pakhat le seh lei tlaitu pakhat hliam fak ngai an put kong, ral lei thawng laaknak hrampi nih an chim.
Hmawbi khuapi ah a tla mi SAC Helicopter cu training tuahnak a si i Helicopter chung ah hin Major General Soe Tin Lat telh in minung 4 an i cit, tiah Hmawbi van ralkap he naihniam in a um mi nih an chim.
“Atu lio Southern Command Air Force Commander cu Major General Soe Tin Lat a si i, Helicopter tlak kong ah thil sining dikthliar in theih a si rih lo. Hmawbi Helipad ah a tla i SAC nih hi thawngpang hi thuhnawh an timh,” tiah Hmawbi khuapi um tualchung mi nih an chim.
SAC kuttang Telegram channel cheukhat nih Hmawbi khuapi ah training tuahnak Helicopter pakhat a tla i Major General pakhat a thi tiin an ṭial ve, tiah theih a si.
Photo — hmanthlak hlun
Mizoram ramkulh, Aizawl khuapi ah Zo Reunification Organisation(ZORO) tawlrelpinak in CNF/CNA le ZRO/ZRA cu a luancia July 27 ni ah tonbiaruahnak an ngei i, cu kong ah cun ZRA-EC nih CNF/CNA he tonbiaruahnak kan ngeih mi ah kahdohnak ngol ding kong aa tel lo i remdaih hnathlaknak kong aa tel lo, tiah nizan August 1 ah an thanh.
“CNF/CNA he tonbiaruahnak kan ngeih mi kong ah kan mipi hna nih nan kan lunghrinh mi cung ah nawl kan i duh mi hna cu, fehternak a um lo mi thawngpang a lengvak mi zumh hrimhrim lo ding. Remdaihnak kha a biapi ah kan chiah ko nain hriamtlai phu pakhat khat nih dik lo tuk in kan hmunram an kan cuhkalh ahcun kan nunnak thap in kan hmunram le miphun ca ah fek tein kan dir lai,” tiah ZRA-EC an thanh.
Chin ralkap CNA le ZRA cu kaphnih kar i hmuhthiam lonak ruang ah an i kap tawn i kaphnih in thi le hliam zong an um tawn caah ZORO tawlrelpinak in a luancia July 27 ni ah khan tlamtling tein tonbiaruahnak an ngei kho i remhdaihnak ser ding in hmailei ah i tong lengmang ding in kaphnih in lungtlinnak an ngeih hnu ah atu bantukin ZRA-EC nih mipi sin ah theihternak cathanh an chuah.
Leave a Reply