Indianapolis High School Pahnih ah Chinca an Cawng Lai A Sung Lawi Tuk Ee ><>>>>>

August 2 || Thechinstar

Chinmi tampi khua an saknak US ram, Indianapolis khua i acozah High School pahnih ah Chinca an cawng cang lai, tiah thawng kan theih.

Chinca cu Southport High School le Perry Medridian High School ah cawn ding in timhtuah a si i, August 2024 in hin cawn hram an thawk cang lai, tiah theih a si.

Hi kong he pehtlai hin Indiana Chin Baptist Church ah Literature Director a simi Pu Thlasui Tluangneh nih High School pahnih ah an cawn dingmi hi Hakha Chin a si, tiah a chim.

“Hakha Chin a si. Indiana ah hin health, education, court, tibantuk le rian an ṭuannak tehna ah hman tam bik holh cu Hakha Chin a si ti hi data in a lang tuk a fiang ko i, holh dangdang a si lo, Hakha Chin ca a si ko lai,” tiah a chim.

Spanish, French le Chinese tibantuk caholh pawl an cawn bantuk in Hakha Chinca zong cacawn caan (Class Periods) chung ah Elective in cawn a si lai, tiah a chim chap.

“Hika Perry Township, Laimi kan i butnak bik high school pahnih, Southport High School le Perry Medridian High School ah class periods chung ah Elective in an cawng lai. Spanish, French, Chinese tehna an laak tawn bantuk in,” tiah a chim.

Perry Township ah Chinca cawn a si cang lai timi theihternak Program zong July 30 ah khan an tuah i, Perry Township Schools Superintendent Dr.Spray, Chin Community of Indiana (CCI) Board President Rev. Dr. Thlaawr Bawihrin le ṭuanvo ngeitu upa hna nih an telpi hna, tiah theih a si.