Shan ramkulh chaklei, Lashio khuapi ah hrambunh mi North Eastern Command Headquarters cu MNDAA hruai mi ṭangṭi phu nih nihin August 3 ah a ningpi in an laak i, SAC ralkap nih hramhram in nawlngeihnak an laak hnu ah Command Headquarters laak hmasa bik mi a si, tiah theih a si.
“Kan theih khawh mi vial ah nizan ah SAC ralkap cheukhat hriamnam chiah in aa ap mi an um, a cheu cu a zaam mi zong an um. North Eastern Command Headquarters cu ṭangṭi phu nih an kulh dih i cunglei ṭuanvo ngeitu pawl nih a ningpi laak a si kong an thanh te ko lai,” tiah MNDAA ral hmaikal thawng laaknak hrampi nih an chim.
Cu pin ah North Eastern Command Headquarters hmunram chung um SAC ralkap vialte an zaam dih i MNDAA ṭangṭi phu nih hmunram thianhfelnak an tuah kong, CDM Captain Zin Yaw nih a chim.
“Atu ah cun North Eastern Command Headquarters hmunram chung in SAC ralkap an zaam dih. Hriamnam chiah in an i ap le ap lo chim awk a ṭha lo nain SAC ralkap nih
North Eastern Command Headquarters an chuahtak dih ti cu a fiang ko,” tiah CDM Captain Zin Yaw nih cun a chim.
Lashio North Eastern Command Headquarters Hmunram In SAC Ralkap Le An Chungkhar 200 Nih Hriamnam An Chiah>>>>>>
Shan ramkulh chaklei, Lashio North Eastern Command Headquarters hmunram in SAC ralkap le an chungkhar telh in minung 200 nih hriam an chiah i SAC ralbawi ngan pakhat hliam fak ngai a put kong, CDM Captain Zin Yaw nih a chim.
Hriamnam chiah in aa ap mi pawl hi Lashio North Eastern Command Headquarters hmunram ah a um mi 200 tiin thawng laaknak hrampi nih an chim i ihkhun 100 tlum No.9 Tatmadaw siizungpi i a um mi pawl zong an si kho, tiah Captain Zin Yaw nih a chim.
“Hliam a pu mi hi Lieutenant Colonel rank hrawng a si. A cuap ah hliam fak ngai a pu i a holh kho lo. Biatak tein chekhlatnak tuah lio a si,” tiah Captain Zin Yaw nih cun a chim.
Atu ah cun MNDAA ralkap pawl nih Lashio SAC siizungpi an laak cang i North Eastern Command Headquarters a laifang tiang an phan cang, North Eastern Command Headquarters zungpi zong an kulh dih cang, tiah theih a si.
Leave a Reply