Israel leh Lebanon helpawl, Hezbollah inkar boruak sosang zel avangin Lebanon-a Indian embassy chuan thuchhuah siamin, India mite chu fimkhur turin a chah.
Palestinian firfiak pawl, Hamas-ten October 7, 2023-a Israel an beih leh, hemi chhan letna atan Israel-in Hamas rorelna, Gaza Strip a beih hnuah, Hamas thlawptu Hezbollah leh Israel hi October 8 aṭang khan an ramriah an inbei zui ve nghal a ni. Tun thlengin buaina chhuak hian ziaawm lam a la pan thei lo a ni. Israel sipaite hian Israel ram luah, Golan Height-a ṭhalai 12 te thihna a mawhphurtu bera puh, Hezbollah military commander Fouad Shukur chu bitumin, tun hnaiah Shukur hi thah a ni tih pawh an puang chiang tawh bawk.
Lebanon khawpui, Beirut-a Indian embassy chuan X-ah, “Israel leh Hezbollah inkar buaina a sosan zel avangin, Lebanon leh a chheh velah thuthar awm leh hma chu zin emaw tlawh pawh emaw rih lo turin India mipuite ngen a ni” tiin, hei bakah Lebanon leh a chhehvela India mi khawsa mekte pawh insaseng vat turin thurawn an pe bawk a ni.
Indian Embassy chuan August 1, Nilainia Hamas hruaitu Ismail Haniyeh leh Hezbollah military commander Fouad Shukur te thah an nih avangin buaina sosang zel thei a ni a, hei vang hian India mipuite him zawk nana thuchhuah hi siam an nih thu an sawi.>>>>>>>>>>>>>>>>>>>>>>>>>>>>>>>
Meitei leh Hmar hruaituten Assam-ah inremna an ziak
3rd August 2024
Meitei leh Hmar aiawhte chuan Jiribam district, Manipur-a buaina chhuak a reh theih nan August 1, Ningani khan Cachar district, Assam-ah inbiakna neiin district chhung buaina a reh theih nana thawk ho turin inremna an ziak.
Meitei leh Hmar aiawhte hian CRPF hmunah inbiakna hi neiin Jiribam district Administration kaihhruaina hnuaiah neih a ni a, Jiribam DC, DIG CRPF Jiribam, Jiribam Sr. SP, Commandant 39 Assam Rifles leh Commandant 87 Bn CRPF te an tel a ni. Heng bakah hian Jiribam district-a cheng Thadou, Paite leh Mizo aiawhte pawh inbiaknaah hian an tel bawk.
Inbiakna zawh fel a nih hnu hian thuchhuah inṭawm siamin, Meitei leh Hmar hnamte chuan boruak ralmuang a awm theih nan ṭan an lak dawn bakah chenna in inhalsak leh inkahna thleng ṭhin a ziaawm theih nan hma an la dawn a ni. Jiribam chhunga security force-te thawhpui tura an intiam bakah mipuite chetna tibuai lo turin an intiam bawk. Inbiakna hi August 15, 2024 hnu lama neih leh tura ruahman niin, inremna tihhlawhtlin nana an hmalakna thlir let a nih bakah inbiakna neih chhunzawm leh a ni ang.
Vanglaini Hmarchhak
Leave a Reply