Mandalay-PDF Nih Tapeihcin Peng, Zayatkun Palik Sakhan He Sakhan 9 An Lak Cang
===========================+===============================
Mandalay ramtthen, Tapeihcin peng, Zayatkun khua Palik sakhan cu Mandalay-PDF nih an kah i an lak. Hi sakhan he SAC ralhrang an lakmi hi 9 a si cang tiah Mandalay-PDF nih kan lak cang tiah an thanh.
August 9 khan Mipi ralkap Mandalay PDF nih Tapeihcin peng Khah-lah-yah 148 ralhrang sakhan, Kyauk Phyu khua i a ummi SAC ralhrang sakhan le Leih khuate Sakhan, Kun 30 khua Sakhan, Letpanpyant khua sakhan,Fukung Sakhan, Wah-teh khua Sakhan hna tiin Sakhan 8 an rak lak cang.
Tapeihcin peng SAC ralhrang thianhhlimhnak ah SAC ralhrang pawl an hriamnam tampi zong kan lak hna tiah Mandalay-PDF nih an thanh.
Mandalay-PDF hi naihrawng ah teinak a hmu ngaingai mi an si. Anmah le 1027 second wave operation min bunh in a kalmi hna TNLA hruaimi hna pawl hi teinak a hmu ngaimi an si.
Kawlram mipi kan tha chia hrimhrim hlah seh! Kawlram khuapi 359 chungah Mipi ralkap kut ah Khuapi 252 a um cang i SAC ralhrang uknak tang ah khuapi 98 lawng a tang cang. Khuapi 252 hmanh kan lak khawh ahcun a tangmi Khuapi 98 zong kan lak khawh ko lai tiah NUG Defense Minister U Ye Mon nih a chim.
Tutan dothlennak ah teinak kan hmuh ning hi phun 4 in tthen khawh a si:
1.Kawlram khuapi 75 cu Mipi ralkap nih a ningpi in tlamtling tein an lak khawh cang i annah control nak tangah a um cang.
2. Khuapi 105 ah ummi SAC ralhrang pawl cu khuapi chung in chuak kho ti lo dingin mipi hriamtlai phu nih an erh hna.
3. Khuapi 74 ah mipi ralkap hna nih kahdohnak an kalpi cuahmah cang i, SAC ralhrang nih an uk khawh mi khuapi 98 lawng a si cang,” tiah NUG Defense Minister U Ye Mon nih a chim.
Hi thil hi kan zoh ahcun SAC ralhrang nih Myanmar ram chung khuapi 100 hmanh a uk kho ti lo i zatuak in 28% lawng a uk khawh mi a si cang, tiah a chim chap.
“Naite ahkhan SAC ralhrang sakhan lak ah a ngan bik pawl simi Shan ramkulh, Lashio khuapi hrambunh North Eastern Command Headquarters pi cu mipi ralkap hna nih an laak khawh.
Hi nih a langhter mi cu zeibantuk SAC ralhrang Command Headquarters hmanh nih mipi ralkap thazaang hi a kham kho ti lo.
Cucaah mipi ralkap hna nih teinak kan hmuh ding ni a nai te cang,” tiah NUG Cozah, NUG Defense Minister U Ye Mon nih cun a chim.
Mandalay ramtthen, Tapeihcin peng, Takawng khuapi, SAC ralhrang milu 100 tluk an umnak Sakhan cu mipi ralkap PDF nih a ningpi in an lak khawh cang tiah theih a si.
Hi sakhan ahhin hriamnam tampi zong an lak chih pin ah SAC ralhrang a nungin kan tlaihmi hna zong an um tiah Mipi ralkap PDF nih an langhter.
Nizan August 12 ahkhan Takawng khuapi Admistration zung, palik sakhan le SAC ralhrang zung paoh kan lak viar tiah an thanh.
Takawng khuapi chung in SAC ralhrang minung 100 hrawng le Pyusawthi le Pyitusit pawl zong an zam dih cang. Takawng khuapi cu mipi ralkap kut ah a ningpi in a um cang.
Leave a Reply