Mindat ah SAC miakpi kah mi nih nufa a tlak hna; a nu a thi i a fanu baan a bul
Mindat hrambunh LIB-274 nih an kah mi miakpi bombkuan cu Mindat khua chung ah a tla i nutung pakhat nunnak a liam, a fanu cu a baan le a lu ah hma a pu tiah theih a si.
August 9 zaanlei sang ah SAC ralkap kah mi miakpi kuan cu Mindat khua, Ashipyin sang ah a tla i Pi Ling Shen (kum 33) a thi.
A thi mi Pi Ling Shen i a fanu kum 6 ngakchia zong a baan a bul i hma faak a pu tiah tualchung thawngzamh nih an langhter.
“Ashipyin sang, Bangalow pawng duum ah tawlre hmun an va zoh i cuka ah cun hriampi nih a khen hna. A nu cu a hmun ah a thi i a fanu cu a baan a bul,” tiah khuami pakhat nih a chim.
Cu ni ṭhiamṭhiam ah SAC jet vanlawng nih Lawi Pang (Lwepan) khuate ah Pound 500 bomb a thlak caah sianginn le inn pathum a rawk tiah CHRO nih a langhter.
Photo: HKL-Mindat, CHRO
Matupi peng chung mizapi lak ah zatuak in 90% hrawng nih hin Matupi peng chung ah AA ran rak luhmi an duh lo, tiah Matupi hruaitu upa hna nih an chim.
Mizoram, Lawngtlai khua ah Chin ralzaam hna nih AA duhlo langhternak an tuah i, cuka hmun ah aa telmi Matupi lei hruaitu hna nih a cunglei bantuk in an chim hi a si.
Lamzawhnak ah aa telmi Matupi lei hruaitu pakhat nih, “Arakan Army a sawmtu hna hi Matupi mizapi tam deuh nih an cohlang hna lo. Zatuak in 100% ah 10% hrawng lawng nih AA an cohlan. A dang 90% nih Arakan Army kan duh lo, kan cohlang lo. Chinland Council hi kan cohlan,” tiah a chim.
Matupi ralzaam hna hruainak in August 10 ah khan Lawngtlai khua CYLA cerhtual ah Chin ralzaam hna nih AA duhlo langhter an tuah in, Matupi, Hakha, Thantlang, Paletwa le hmun dangdang in Lawngtlai ah ral a rak zaammi minung 700 in 1000 karlak an i tel.
Matupi ralzaam hruaitu pakhat nih, “Duhlonak kan langhternak i kan i tinhmi cu Chinram in a rianrannak in AA a chuah nakhnga hi a si. Matupi peng sining zoh tikah Kala khua, Lasing khua, Vualangte khua, Vualangpi khua ah AA nih hmunhma an laak. Khuami zong ralzaam in an um. Khuami meithal in an kahmi hna zong an um. AA bomb ruang ah khuami kebul mi zong an um. Cheukhat khua ah leițuan ding in a kalmi Nu an tlaih hna, an thlah ṭhanmi hna zong an um. Mizapi nih ṭih ding in an um pin ah nuhrin covo an buarmi zong a um. AA ralkap an umnak ah khuami an zaam dih,” tiah a chim.
Matupi siseh, Paletwa zong ah siseh, SAC ralkap an um ti lo nain nihin ni tiang kan kir ngam lonak cu AA an um ruang ah a si, tiah a chim chap.
Lawngtlai khua ah hin Matupi, Hakha, Thantlang, Kalay le Paletwa lei in Chin ralzaam 5000 in 7000 karlak an um i cu chung ah cun zatuak in 90% hrawng hi Matupi ralzaam an si hna, tiah thei a si.
Shianram chaklei, Myanmar-Tuluk ramri Muse khua i Mingalar-Muse a hnulei lampi pawng ah mi zei theih lo mi nih kum 75 a simi tarpa an hlonh ta mi cu mibawmtu bu nih August 10 ah an char, tiah theih a si.
Khuami pakhat nih, “Phone a kan chonh i kan va bawmhmi a si. Tangyan mi ka si tiah a ti nain a si lo. Muse khua chaklei sang ah ka fale an um a ti. Naihniam chungkhar kan pehtlaih ko hna nain kan zohkhenh kho ti lai lo an ti. Nizaan in nihin tiang sizung ah kan zohkhenh lio a si. Mibawmtu bu nih zun-ek pawl zong an fimtawlpiak. Lam a kal kho lo, rawl zong tuh chom a hau, tampi cu a ei kho lo,” tiah mibawmtu chungtel pakhat nih a chim.
“Tarnu tarpa pawl hi nan zohkhenh khawh ti hna lo a si ahcun atu bantuk in lam pawng ah chiahtak lo in tar zohkhenhnak asiloah mibawmtu pawl sin ah thawng theihter hnu ah nan chiah ah a ṭha,” tiah mibawmtu chungtel pakhat nih a chim.
Chungkhar nih lam pawng ah an chiahtak mi tarpa cu mibawmtu bu nih ṭha tein an zohkhenh i thlopbulnak zong an ngeih chuahmah lio a si, tiah Shan thawngzamhnak nih a ṭial.
Cikhua khuapi tel in Tonzaang peng pumpi chung ah umhmun khuar hrimhrim lo ding in CDF-Tonzang nih ZRA/ZRO cu nihin August 10 ah faakpi in ralrin a pek.
Chinland Council ralkap phu komh nih Tonzaang khua tel in Tonzaang peng kan laak khawh ding cang caah Tonzaang peng pumpi chung ah SAC ralkap an thiang cang i, CDF-Tonzaang le Chinland ralkap phukomh nih hmunhma kan laak cang tiah cathanh ah an ṭial.
“ZRA/ZRO ralkap hna nih Cikha khuapi tel in Tonzaang peng chung ah umhmun khuar hrimhrim lo ding ah faakpi in kan in khap hna,” tiah an langhter.
Kan in khap mi hna nan zulh lo ahcun kahdohnak in faakpi in dantat nan si lai ti zong CDF-Tonzaang nih ZRA/ZRO ralrinpeknak cathanh an an langhter.
Tonzaang peng chung ah SAC ralkap an um ti lo i, zalong tein tlonlen khawh a si cang caah ralzaam pawl rak kir cang ding zong CDF-Tonzaang nih nihin ṭhiamṭhiam ah forhfialnak an thanhchih.
Photo: CC ralkap le ZRA hmanthlak cheukhat
Leave a Reply