Mandalay ramṭhen, Thabeikkyin peng, Takaung khuapi kahdohnak ah SAC ralkap 64 an thi i minung 20 an tlaih hna. Cu kahdohnak ah cun tualchung hriamtlai phu nih meithlal 83 an laak kong, No.1 ral hmunram um mi nih thawng an thanh.
A luancia August 11 zinglei ah Thabeikkyin peng, Takaung khuapi cu No.1 ral hmunram, Mandalay ramṭhen ṭuanvo ngeitu zung hruainak in Special Force Battalion 3, No.511 Battalion, Mandalay pengkomh Battalion 4, Mandalay ramṭhen Drone phu le Thabeikkyin peng Pah-Kah-Phah nih kah hram an thawk i a thaizing August 12 zanlei ah Takaung khuapi cu an laak, tiah theih a si.
Takaung khuapi ah cun Lieutenant Colonel Yay Khung le Major Moe Tun hruai mi Tah-Tah-Kah 13, Major Moe Win hruai mi Sah-Khah-Tah 2, palik bawizik Aunh Ko Win hruai mi palik phu le penguk bawichang Zaw Lin Naing hna umhmun an khuarnak penguk zung, siizung le palik sakhan cu August 11 ni ah khan an laak i Maymyatna pura cu August 12 ah tlamtling tein an laak, tiah theih a si.
Takaung khuapi kahdohnak ah cun SAC ralkap 64 an thi i minung 20 an tlaih hna pim ah tualchung hriamtlai phu nih hriamnam 83, kuan 14,000 leng le bomb 130 hrawng an laak i tualchung hriamtlai phu in ralkap pahnih nih ram ca ah an nunnak a pek ve, tiah theih a si.
Chinland Defense Force – Kalay Kabaw Gangaw(CDF-KKG) In Ralkap Pakhat Nunnak A Liam>>>>>>>>>>
Chinland Defense Force – Kalay Kabaw Gangaw(CDF-KKG) le SAC ralkap kar kahdohnak ah CDF-KKG in ralkap pakhat a nunnak a liam, tiah theih a si.
“CDF-KKG Battalion 6 in ralkap Kyaw Zin Phyo cu hramhram in nawlngeihnak latu SAC ralkap kahdohnak, hramhram uknak hrawh ding, mizapi runven ding le Federal Democracy rampi ser khawh nakding in ral a tuk cuahmah lio nizan August 14 ni ah ram le miphun ca ah a nunnak a pek.”
“Ram le miphun ca ah na nunnak tiang na pek caah CDF-KKG nih upatnak kan in pek. Na kaltak mi na chungkhar an ngaihchiatnak kan hrawmpi hna,” tiah Chinland Defense Force – Kalay Kabaw Gangaw nih nihin August 15 ah ngaihchiatnak cathanh an chuah.
Visit Passport I Tlaih In Ramdang Ah Rianṭuan Aa Tim Mi Paoh Airport Le Ramri Ah Kham An Si Lai Tiah SAC Nih Fehter>>>>>>>>>
Myanmar ram in ramdang tlawnnak Visit Passport i tlaih in rianṭuannak Visa he ramleng chuah aa tim mi paoh cu Aiport le ramri check gate ah chekhlat in kham an si lai, tiah SAC nih fehter in phungning tein thawngthanhnak an tuah.
Ramdang ah kal in rianṭuan aa tim mi paoh nih Labour Ministry ah ramdang rianṭuantu sinak ID i tuah in ramdang rianṭuannak theihpinak Oversea Workers Identity Card (OWIC) ngeih lawng ah ramdang ah kal in rianṭuan khawh a si lai. A liamcia 1999 kum i ramdang kal in rianṭuan khawhnak phung zong ah rianṭuantu pawl nih ID tuah lo in ramdang ah an kal i rian an ṭuan ahcun ramleng chuah a rem lo caah phihkhamnak an tuah kong, SAC nih an langhter.
SAC nih an langhter ning ah cun, ramdang ah kal in rianṭuan aa tim mi paoh nih ramdang tlawnnak passport phun, rianṭuannak ca i chuah mi Passport for Job -PJ lawng in an kal kho lai i Labour Ministry ah ID i tuah hnu lawng ah ramdang ah rianṭuan a ngah lai.
Ramdang tlawnnak Visa (PV) i tlaih bu in rianṭuan khawhnak Visa sok in ramdang ah a kal mi cu Aiport le ramri gate ah kham an si lai caah a herh lo mi sunghnak a chuah lo nakhnga rianṭuan aa tim mi nih cun PJ passport sok in ramdang rianṭuannak theihpinak card OWIC ngah hnu lawng ah ramleng ah chuah i zuam u, tiah SAC nih an thanh.
“Atu lio cu kum 23-32 kar pa mino paoh cu PJ he ramdang ah kal an kham hna caah PV passport in ramdang ah an kal hna. Atu dirhmun ah cun mino pawl ca ah ramleng chuah a har ngai i PV in kal aa tim mi cu Aiport in an khirh hna. SAC nih a phan bik mi cu atu bantukin mino pawl ramleng an chuah lengmang ahcun ralkap tlakter ding an um lai lo an ti caah hi thil an tuahnak hi a si,” tiah ramdang kalnak tawlreltu Agent pakhat nih a chim.
Leave a Reply