Chinram, Matupi peng ah hrambunh in hriam a tlai mi CDF-Matupi Battalion 3 nih an hmunram chung i CDF-Matupi Brigade-1 an cawlcangh i duh paoh in an um mi kong ah August 14 ni ah khan duhlonak cathanh an chuah.
CDF-Matupi Brigade-2 tang ah a um mi CDF-Matupi Battalion 3(Kaisi Battalion) nih cun, “Chinland Defense Force – Matupi dirh a rak si ah hin hmunram ngeitu Battalion nawl lo in a dang Battalion nih sakhan chiah in rallam sial tibantuk tuah lo ding in hnatlaknak rak ngeih dih a si nain atu ah cun AA ralkap thazaang bochan in kan hmunram chung ah CDF-Matupi Brigade-1 ralkap pawl duh paoh in an cawlcang”, tiah Kaisi Battalion nih cun an langhter.
“Atu ah hin CDF-Matupi Brigade-1 nih Rakhine ralkap AA thazaang bochan in caan ṭha i laak riangmang in Kaisi Battalion uk mi hmunram chung ah rallam an sial, an ralkap an chiah hna, hramhram in tualchung mi an khawmh hna i tonbiaruahnak an ngeihpi hna, khualtlawng mi an kham hna. Atu bantukin hmunram ngeitu Kaisi Battalion nawl lo in kan hmunram chung ah ralkap chiah le hramhram in tualchung mi khawmh in tonbiaruahnak ngeihpi, khual a tlawng mi tualchung mi kham le hnahnawh peknak tibantuk cu rak ngol cang u.
Atu bantukin nan thil tuah mi nan ngol lo i pehzulh in nan tuah rih ahcun a cang ding mi buainak vialte cu CDF-Matupi Brigade-1 nih ṭuanvo nan laak dih lai,” tiah CDF-Matupi Brigade-2 tang um Kaisi Battalion nih an hmunram chung i CDF-Matupi Brigade-1 ralkap an um mi kong ah duhlonak cathanh an chuah.
Leave a Reply