Chinland Council (CC) le Chin Brotherhood (CB) karlak ah a cangmi buaibuainak a daih khawh nakhnga kap hnih ton biaruahnak an ngei lai, tiah theih a si.
Remnak sertu bu Crisis Management Initiative (CMI) hruainak in atu August zarh thumnak ah CC le CB cu Delhi ah ton ding in timhtuahnak an ngei, tiah CB ṭuanvo ngeitu nih a chim.
CB lei ṭuanvo ngeitu Ko Robert nih, “Hi hlan ah online in biaruahnak cheukhat kan ngei cang. Aralaimi zarh ah hin CMI tlangtlaknak in Delhi ah ton biaruahnak kan ngei lai. Pakhat le pakhat hriamnam in i er len lo in cabuai cung ah bairuahnak ngei i buaibainak daihter hi kan i zuammi zong a si,” tiah Mizzima thawngzamhnak ah a chim.
CMI hruainak in Delhi ah tuah an timhmi CC le CB ton biaruahnak ah kan kai ko lai tiah CNF/CNA chimnak nawlngei Salai Htet Ni nih a chim.
Salai Htet Ni nih, “Kan kai lai. Zei bantuk biaruahnak a si poh ah thil ṭha a si ko. Hi bantuk ton biaruahnak ngeih ding hi a terte in kan rak duhmi zong a si,” tiah a chim.
CC le CB ton biaruahnak ngeih ding in a tawlreltu CMI cu Finland ram, Helsinki khua ah hram a bunhmi remnak sertu NGO a si i, bu khat le bu khat karlak remdaihnak sernak lei ah kum 20 leng rian a ṭuan cangmi a si, tiah kan theih.
Leave a Reply