Chin National Defense Force (CNDF) ralkap pakhat cu nizan August 20 i Kalay peng, Shadaw khua kahdohnak ah khan SAC ralkap nih an thah i a ruak an khangh, tiah theih a si.
Sagaing ramṭhen, Kalaymyo in Shadaw khua lei ah rallam sial mi SAC ralkap pawl le CNDF ralkap kar ah kahdohnak a chuak i CNDF ralkap Salai Van Ṭha Bik(kum 26) cu SAC ralkap nih an tlaih i an thah hnu ah a ruak an khangh, tiah theih a si.
Hi kong he pehtlai in CNO/CNDF chimnak nawlngei Salai Timmy Htut nih, “Nizan i Shadaw khua lei i rallam sial mi SAC ralkap pawl le kan ralkap kar ah kahdohnak a chuak i Salai Van Ṭha Bik hi tlaih a ton hnu ah an thah i Shadaw khua inn an khangh mi ah a ruak an khangh chih,” tiah a chim.
CNDF ralkap Salai Van Ṭha Bik ruak cu tualchung hriamtlai phu nih an laak khawh i Khrihfa biaknak phung he a kaang thlu lo mi a ruak cu an vui, tiah Zalen nih a ṭial.
Lawngthantlang I A Cang Mi Biaknak Lei Buainak Cu Lautu Mizapi Council Tonbiaruahnak Ah Ceihmai An Timh>>>>>>
Chinram, Lautu hmunram, Lawngthantlang i a cang mi biaknak lei buainak kong he pehtlai in Lautu mizapi council tonbiaruahnak ngeih tik ah ceihmai te ding in Lautu zatlang ukhruaitu phu nih khua an khan i huatnak a karhter kho mi thil hrial ding le ralrin cio ding ah, Lautu zatlang ukhruaitu phu zung nih nizan August 19 ah cathanh an chuah.
A luancia August 18 ni ah khan Lautu hmunram, Lawngthantlang khua AG Khrihfabu chungtel cu khua in an chuah hna tiin video a rak lar ngai i Online ah a rak linsa ngai. Atu bantuk Lawngthantlang khua biaknak kong buainak cu a luancia April thla donghlei ah khan a rak i thawk mi a si i an hmunram chung nawlngeitu sin ah report an rak tuah veve kong le Lautu hmunram zatlang ukhruaitu phu nih a luancia May 16 le May 25 ni ah Lawngtlang khua ah va fuh hna in thil sining an zohpi hna nain kaphnih kar buainak a san tuk lio a si caah remdaihnak an rak serpi khawh hna lo kong zong, Lautu hmunram zatlang ukhruaitu phu nih an langhter.
“Hi kong ah a herh mi tete dothlatnak kan ngeih i tonbiaruahnak tlamtling in ngeih a si hnu ah Lautu mizapi Council tonbiaruahnak ah ceihmai ding in biachahnak tuah a si cang caah atu bantuk caan ah caan ṭha rak i laak in mizapi sin ah ram rak khel in dohthlennak tiang a hnursuantertu paoh cu dantatnak pek an si lai.”
“Ramchung ramleng ah a um mi Lautu mizapi zong nih a herh lo mi huatnak a chuahter khotu forhnak kong ah biapi ngaiin ralrin an herhnak kong le mah le mah kar ah lungrualnak a tlau lo i dohthlennak hmuitinh he fek tein a dir mi si an herh kong,” Lautu hmunram zatlang ukhruaitu phu nih cun an langhter chih.
Thantlang Khuapi Ah Kahdohnak A Fak, SAC Ralkap Nih Vanlawng Le Hriamngan In Kahdohnak An Tuah>>>>>>
Chinram, Thantlang khuapi ah Chinland Council ralkap le SAC ralkap kar nihin August 20 zinglei ah kahdohnak a fak i SAC nih vanlawng in pehtlai in bomb an thlak pin ah Hakha lei in hriamngan in kahdoh an bawmh hna, tiah theih a si.
Thantlang khuapi chung i tlakrawh inn hlun ah aa dup mi SAC ralkap pawl cu CC ralkap nih nihin zinglei ah an kah ṭhan hna i SAC ralkap nih raltuknak vanlawng in bomb voi thum hrawng an thlak kong, CNF chimnak nawlngei Salai Htet Ni nih a chim.
Cu pin ah Hakha khuapi Rung tlang um mi SAC ralkap zong nih Thantlang khuapi ah hriamngan voi 10 hrawng an kah, tiah theih a si.
Atu lio ah kalpi cuahmah mi Tilim Operation 4 cu CC ralkap nih a luancia July 22 ni in an rak thawk i Operation kahdohnak chung ah Thantlang khuapi um Khah-Lah-Yah 269 sakhan le Hakha–Thantlang kar i a um mi SAC ralkap sakhan 8 hrawng cu CC ralkap nih an laak cang. Cu kahdohnak ah cun SAC ralkap 30 hrawng an thi i hriamnam he CC ralkap sin ah aa fonh mi zong an um, tiah theih a si.
Leave a Reply