Sagaing ramṭhen, Kalay peng, Sawbwaryaeshin khua ah NUG cozah kuttang tualchung hriamtlai phu nih an on mi siikhan cu SAC nih nizan August 27 ah vanlawng in bomb an thlak caah mizaw thlopbultu PDF pakhat a nunnak a liam i a zaam kho lo mi mizaw pakhat a ke ah hliam a tuar, tiah thawng laaknak hrampi nih an chim.
SAC nih Kalaymyo–Kalewa lampi kam i a um mi Sawbwaryaeshi khua ah nizan August 27, chunhnu suimilam 3:00 hrawng ah vanlawng in pound 500 a rit mi bomb an thlak mi cu NUG siikhan ah a tla i PDF pakhat a nunnak liam, mizaw pakhat a ke ah hliamtuar, tiah Kalay PDF chungtel pakhat nih a chim.
SAC nih atu bantukin vanlawng in kahdohnak an tuah i bomb an thlaknak cu thawngpetu an um ruang ah a si i kaphnih kar kahdohnak zong a um lo. SAC nih vanlawng in bomb an thlak ruang ah a thi mi PDF pakhat cu Tamu pengkomh Special Battalion SR-4 ralkap pakhat a si, tiah Tamu pengkomh ral lei thawng laaknak hrampi nih an chim.
SAC nih Kalaymyo–Kalewa motor lampi kam i a um mi Sawbwaryaeshin khua telh in Kanaan le Khampat khua ah bomb an thlak ruang ah tualchung mi 30 hrawng an nunnak a liam, tiah tualchung mi nih an chim.
Thimnak Tuah Hlan Ah Kahdohnak Biatak Deuh In Kalpi An Timh Kong NUG Nih An Chim>>>>>>>>>>>>
SAC nih an timh mi thimnak tuah hlan ah Myanmar ram hmun kip ah biatak deuh in kahdohnak kalpi ding le ramkhel kong ah timhlamhnak ngeih ding ah NUG Prime Minister Mahn Win Khaing Than nih nizan August 27 ah tuah mi NUG cozah tonbiaruahnak ah a chim.
SAC ralkap nawlngeihnak ṭha lo a hram bongh ding ah tualchung hriamtlai phu vialte lungrual tein um a herh kong le zei thil kong hmanh ah timhcia tein um ding le kahdohnak fak deuh in kalpi a herh kong, NUG Prime Minister Mahn Win Khaing Than nih a chim.
“SAC nih tuah an timh mi thimnak a cohlang i tha a pe mi ram cheukhat zong an um caah cu pawl zong nih cun a lam kip in bawmh an timh hna. Cucu kannih nih ṭha tein kan ruah a hau i biatak tein kahdohnak fak deuh in kalpi a herh, kam khatlei ah ramkhel kong zong ah timhcia tein um kan hau,” tiah NUG Prime Minister nih cun a chim.
“Ramkhel kong he pehtlai in ramkhel ning, pehtlaihnak tuah ning, tualchung hriamtlai phu nih ral kong ah an i timhlamh ning le i ukhruainak kong ah timhcia tein um kan hau. Atu ah cun SAC nih hramhram in ralkap ah an luhter hna, sang le khua vengtu phu an dirh i tualchung mi pawl cu kahdohnak ah hman an timh hna,” tiah a chim chap.
SAC nih a ralai mi 2025 November thla ah khin thimnak tuah an timh i cu thimnak cu Proportional Representation (PR) hman an timh, tiah theih a si.
Mindat Khuapi Khah-Lah-Yah 274 Battalion Sakhan Ah SAC Nih Vanlawng In Hriamnam An Thlak>>>>>>>>>>>>
Chinram, Mindat khuapi hrambunh Khah-Lah-Yah 274 Battalion sakhan ah SAC nih vanlawng in hriamnam an thlak, tiah theih a si.
Nihin August 28, zinglei suimilam 8:30 hrawng ah SAC nih Y-12 vanlawng in an phurh mi hriamnam le eidin tirawl cu Parachute in Mindat khuapi hrambunh Khah-Lah-Yah 274 Battalion sakhan ah an thlak, tiah Mindat peng thawngzamhtu Hkl Mindat nih a thanh.
Atu hrawng cu SAC nih Mindat peng ah vanlawng in bomb an thlak lengmang pin ah Khah-Lah-Yah 274 Battalion sakhan in an duhnak paoh ah hriamngan an kah i Drone in bomb an thlak lengmang caah Chin Defence Force – Mindat nih Mindat peng tualchung mi cu ralring tein um ding in thawng an thanh hna.
Nawlngeihnak Laak A Si Hnu Ah SAC Nih Journalist 7 An Thah Hna I Minung 60 Leng An Tlaih Hna>>>>>>>>>
Hramhram in nawlngeihnak laak a si hnu ah SAC nih Journalist 7 an thah hna, minung 62 an tlaih hna i thong an thlak hna kong, ramri a ngei lo mi thawnglatu (RSF) nih an thanh.
August 21 ni ah Mon ramkulh ah Journalist Htet Myat Thu le Win Htut Oo cu an umnak inn ah SAC ralkap 20 hrawng nih luhhnawh in an thah hna i an ruak an khangh hna, tiah theih a si.
Journalist pahnih SAC ralkap kut in an thih mi kong ah ramri a ngei lo mi thawnglatu (RSF) phu nih duhlonak langhter in SAC cu sual an phawt hna. Hramhram in nawlngeihnak laak a si hnu ah hin Khonumthung Media dirhtu Pu Tuidim, Federal News Journal Editor Sai Win Aung cu rian an ṭuan lio ah SAC ralkap pawl nih an thah hna, tiah theih a si.
Freelance Journalist Aye Kaw, Soe Naing le Myat Thu Tun cu thonginn chung ah an thah hna. Journalist Myat Thu Tun cu thonginn chung ah fak ngaiin an rak hrem hnu ah an thah, tiah theih a si.
SAC ralkap nih hramhram in nawlngeihnak an laak hnu ah Media rianṭuan mi pawl cu SAC nih ral ah ruat in khuapi chung i chelhlatnak an tuah zong ah phone an zohpiak hna i Media he pehtlaihnak an ngeih le ngeih lo biatak tein an chekpiak hna, tiah theih a si.
Tedim Peng, Valvum Khua Ah Inn Pakhat Ciam Dih In A Kaang>>>>>>
Chinram, Tedim peng, Valvum khua ah nihin August 27, zanlei suimilam 4:00 hrawng ah khan Pu Gen Lian inn cu ciam dih in a kaang, a kanghnak a ruang theih a si lo i ihnak khan in kangh hram aa thawk, tiah chungkhar he naihniam in a um mi nih an chim.
“Inn ngeitu Pu Gen Lian cu kawm rialnak seh a ngei mi a si. Kawm an rial lio ah an inn hi a kaang i a kangh an theih ahcun mei a rak i hliau cang. Khuapi te in an phalh nain an phalh manh ti lo caah a ciam dih,” tiah chungkhar he naihniam in a um mi nih cun an chim.
“Pu Gen Lian cu an khua ah dinti lei rianṭuannak ah hruaitu pakhat a si. Thing inn lian ngai mi a si i an sak limnak hmanh a rau rih lo. Atu i inn kaang ah hin nunnak liam mi le hliamtuar mi tu cu an um hraw lo,” tiah Valvum khua tualchung mi pakhat nih a chim.
Valvum khua cu Tedim khuapi nichuahlei tlang cung hmun rem ngai ah tlak mi khua a si caah inn a kangh lio cu Tedim khuapi in hei hmuh khawh a si, tiah Tedim khuapi um tualchung mi nih an chim.
CDF-Tonzaang Sin Ah SAC Ralkap Pakhat Hriamnam He Aa Fonh>>>>>>>>>
Chinram, Tonzaang peng ah hrambunh mi CDF-Tonzaang sin ah SAC ralkap pakhat cu hriamnam i put in aa fonh kong, Chinland Defense Force – Tonzaang nih nihin August 27 ah an thanh.
Nihin August 27 ah SAC ralkap pakhat cu MA-3 meithal pakhat i put in CDF-Tonzaang sin ah aa fonh caah CDF-Tonzaang nih tangka Kyats sing 50 an pek, tiah theih a si.
Hriamnam he CDF-Tonzaang sin ah aa ap mi SAC ralkap pakhat kong he pehtlai in CDF-Tonzaang Commander in Chief, Salai Thang Suan Mung nih cun, “Falam
hrambunh Battalion in Cikha ah an ṭhial mi a si. Amah hi Tonzaang khuapi kahdohnak thawk hlante ah Helicopter in Tonzaang ah an ṭhial. CDM a tuah cang mi SAC ralkap pakhat nih a van hruai. Hriamnam a kan pek i CDM a tuahnak minsen zong kan thutter, tangka zong kan pek colh i a himnak hmun ah kan kuat,” tiah Chin World Media ah a chim.
Chinland Council Le ICNCC Tonnak Ngeih Timh Mi A Ni An Thawn, I Tong Ding In Timhlamhnak An Ngei Cuahmah>>>>>>>
Chinland Council le Interim Chin National Consultative Council kar tonnak ngeih an i timh mi cu aa relrem ṭhan lo caah a ni thawn chung a si i, i tong ding in timhlamhnak an ngei cuahmah, tiah theih a si.
Crisis Management Initiative (CMI) tawlrelnak in August thla dongh ah India ram, New Delhi khuapi ah tonbiaruahnak ngeih ding in timhlamhnak an rak ngei nain i relrem lonak a um caah a ni an thawn chung kong, Chinland Council GS Salai Paul nih ah a chim.
Tuan deuh i an rak i timh ning ah, CMI nih CC le ICNCC cu a dangte in a ton hna hnu ah kaphnih kar i hmuhthiam lonak kherhhlai in kaphnih kar ah remdaihnak a chuah khawh nakhnga tonbiaruahnak ngeihpi an timh hna nain relrem lonak a um caah CMI lei nih a ni an thawn, tiah theih a si.
Hi kong he pehtlai in Media tampi nih CC le CB i tong ding bantukin an ṭial i CB cu hriamtlai phu ceo an si i ICNCC cu CB i ramkhel hruaitu a si caah ramkhel kong biaruahnak ah cun CC le CB si lo in CC le ICNCC tu an i tong lai, tiah theih a si.
Chin hriamtlai phu nih cabuai cung tonbiaruah in a phichuak kawl kan timh mi nih hin thil ṭha a chuahpi lai i duhsah tein khat le khat i zumhnak a um te lai, tiah Chinland Council GS Salai Paul nih a chim.
“Kan kar ah i fonh khawh colh lonak a ruang tampi a um kho men nain tonbiaruahnak kan ngeih hnu ah pehzulh in cabuai cung ah ceihmainak kan ngeih ahcun duhsah tein khat le khat i zumhnak a chuak lai i hmun khat i rianṭuan khawhnak tiang zong a chuak kho mi a si caah atu i tonbiaruahnak ngeih timh mi nih hin thil ṭha a chuahpi ko lai,” tiah Salai Paul nih cun a chim.
CC le ICNCC tonbiaruahnak ngeih timh mi cu a ni an thawn i, hi kong hi CMI tawlrel mi a si caah zeitik ah dah an i ton lai ti cu fiang in theih a si rih lo.
Mindat Khuapi Ah Bomb Lamhsualnak In Kum 60 Nu Pakhat A Ke Khatlei A Bul>>>>>>>>
Chinram, Mindat khuapi, Electric zung pawng ah a um mi kum 60 upa nu pakhat cu nihin August 27 zinglei ah bomb lamhsualnak in a ke khatlei a bul, tiah Mindat khuapi um tualchung mi nih an chim.
Mindat khuapi, Electric zung pawng thlanglei kam i a um mi kum 60 upa nu pakhat cu dum chung i Hnuhnun a lawh lio ah bomb aa lamhsual i a ke khatlei a bul, tiah Mindat peng thawngzamhtu Hkl Mindat nih a langhter.
Chinram, Rakhine ramkulh, Shan ramkulh le Sagaing ramṭhen telh in kahdohnak a fahnak hmunram hna ah cun leiphum mi bomb le hriamnam a puak rih lo mi a tam ruang ah tualchung mi thi le hliam hi nifatin ti tluk in an um, tiah mi bawmchantu phu nih an chim.
CHRO nih an khawmh mi cazin ning ah cun, SAC ralkap nih hramhram in nawlngeihnak an laak hnu ah Chinram chung ah leiphum mi bomb i lamhsualnak in tualchung mi 36 an nunnak a liam i minung 66 hliam an tuar.
Maungdaw Khuapi Kahdohnak Ah SAC Ralkap 100 Leng An Thi, Minung 63 An Tlaih Hna I Hriamnam Tam Ngai An Laak>>>>>>>>>>
Rakhine ramkulh, Maungdaw khuapi kahdohnak ah Rakhine ralkap AA nih SAC ralkap sakhan pakhat hnu pakhat in an laak thluahmah. Cu kahdohnak ah cun SAC ralkap 100 leng an thi, minung 63 an tlaih hna i hriamnam tam ngai an laak kong, AA nih nizan August 26 zan ah an thanh.
AA nih Maungdaw khuapi ah kahdohnak an kalpi cuahmah i Maungdaw khuapi ah kaphnih kar kahdohnak a fak. Maungdaw khuapi No.2 sang, Fezi le Maungni khua chung i a um mi SAC ralkap, ARSA, RSO le ARA pawl umhmun an khuarnak sakhan tam deuh cu AA nih an laak cang. August 24-26 tiang ni thum chung cu SAC ralkap le
an kuttang ralkap thi mi ruak 100 leng cu ṭha tein an phum hna. Kaphnih kar kahdohnak ah cun SAC ralkap 63 an tlaih hna i hriamnam tam ngai, an laak tiah theih a si.
Kahdohnak ah SAC ralkap ralkap a zaam mi pawl cu AA nih an dawi hna i a taang mi SAC ralkap zong pehzulh in an kah caah Maungdaw khuapi le a peng chung hmun cheukhat ah kaphnih kar kahdohnak a fak, tiah theih a si.
Leave a Reply