A ralai mi September 1 in ramdang kalnak Passport tuah man kaiter an timh kong, SAC kuttang Passport tuahnak zung nih nihin August 29 ah an thanh.
Passport tuah man hi Kyats 35,000 a si tawn nain September 1 thawk in Kyats 40,000 ah kaiter an timh. Atu i SAC nih Passport tuah man an kaiter mi cu voi khat hmanh aa tuah bal lo i a thar aa tuah ding mi ca ah a si. A hlan ah a rak i tuah ko nain a thlau sual i a thar in a sok ṭhan mi hna ca ah cun Passport man ah Kyats 40,000 le Passport thlau man ah Kyats 65,000 tiin a zate ah Kyats 105,000 laak an timh hna, tiah theih a si.
“Passport tuah man an kaiternak hi a ruang theih a si lo. Passport zung nih an kaiter mi a si. Passport tuah man Kyats 5,000 a kai caah Agent le Passport tuahpiaktu pawl nih zeizat dek an hal ve te hna hnga theih a si rih lo. A biapi mi cu Passport tuah tik ah hlen ton lo hi a si,” tiah ramdang kalnak rian a ṭuan i a tawlreltu pakhat nih a chim.
Myanmar ram chung Passport tuahnak zung nih Online in Booking System in Passport tuah cu a liamcia 2022 March thla khan tuahnak nawl an on i tukum 2024 August thla dongh tiang Booking an i laak cia dih cang i Passport a sok mi an tam ngai, tiah theih a si.
SAC Nih Hakha University Luhnak Sok A Ngah Cang An Ti Nain A Sok Mi An Um Lo>>>>>>>>
Chinram, Hakha khuapi ah tukum 2024 tanghra awng mi nih University luhnak sok a ngah cang tiin SAC nih an thanh nain nihin tiang a sok mi an um rih lo kong, Hakha University rianṭuan hna he naihniam in a um mi nih an chim.
SAC kuttang Education Ministry nih cun, Hakha University telh in Myanmar ram hmun kip University 23 ah August 26 in September 12 tiang zung khar caan um lo in sok khawh a si, tiah August 18 ni ah an thanh nain nihin tiang ah a sok mi pakhat hmanh an um lo, tiah Hakha University rianṭuan hna he naihniam in a um mi nih cun an chim.
“Soknak ca cu Hakha peng fimcawnnak zung ah laak in phit hnu ah Hakha University ah ap ding a si. Day in a chung i kai a duh mi le a leng in phit a duh mi nih mah duh mi thim khawh a si. Atu tiang ah cun ahohmanh a sok mi an um lo. September 12 khi a hnu bik caan rikhiah a si,” tiah Hakha University rianṭuan hna he naihniam in a um mi nu pakhat nih a chim.
Hakha University ah siangngakchia tlawmte lawng an kai i khuapi dang in a ra mi an si lo i University chung i a um colh mi siangngakchia lawng ca an kai, tiah theih a si.
Hakha Khuapi Myanmar Economic Bank Ah Tangka A Um Lo, Non-CDM Pawl Zong Thlahlawh An Pe Kho Ti Hna Lo>>>>>>>>
Chinram, Hakha khuapi Myanmar Economic Bank ah tangka a um lo i ṭhaṭhi in Bank ah rian an ṭuan khawh lo pin ah SAC kuttang rianṭuan Non-CDM pawl zong thlahlawh an pe kho ti hna lo, tiah theih a si.
Hakha khuapi Myanmar Economic Bank ah SAC nih Helicopter in tangka an chiah khawh ti lo caah ṭhaṭhi in Bank ah rian an ṭuan kho ti lo i tangka laak ding a um ti lo, tiah Bank rianṭuan he naihniam in a um mi pakhat nih a chim.
“Tangka lut lei hi cu Department kip nih pek lo awk a ṭha lo mi tete ngunkhuai lawng an pek i tualchung mi hna nih cun Bank ah tangka an i chiah duh ti lo. Atu ah cun tangka chuah ding zong a um lo i SAC nih Helicopter in tangka an hong chiah ngam ti lo caah Bank ah tangka a um ti lo,” tiah Bank rianṭuan he naihniam in a um mi pakhat nih cun a chim.
Hakha khuapi Myanmar Economic Bank ah cun ahohmanh nih tangka an chuah ti lo i chuah lo awk a ṭha lo mi Pension thlahlawh hmanh tlamtling in an chuahpiak kho hna lo, tiah theih a si.
Chinram chung ah Chin hriamtlai phu nih hmunram tam deuh cu an uk caah SAC nih motor lampi an hmang ngam lo i hriamnam, eidin tirawl le Non-CDM thlahlawh cu Helicopter deuh in an phurh tawn hna. Atu ah cun SAC nih Kalaymyo
Myanmar Economic Bank tiang lawng tangka an phurh ngam i Hakha khuapi tiang an phurh ti lonak caan a sau cang, tiah theih a si.
Atu bantuk dirhmun an phanh caah SAC kuttang rianṭuan Chinram chung um Non-CDM pawl zong thla fatin in hlawh an hmuh ti lo caah a rem ning paoh in an ṭhenphawt hna. Chinram i a um mi peng 9 chung ah Hakha, Falam, Mindat, Tedim le Khaikam khuaipi chung lawng ah SAC nih ukhruainak an kalpi khawh cang.
Hakha khuapi lawng ah si lo in Tedim khuapi um Non-CDM pawl zong a luancia May thla tiang lawng thlahlawh an hmuh. Falam khuapi zong ah cu ṭhiam, June thla tiang lawng thlahlawh an hmuh ve. SAC kuttang Department pakhat le pakhat an i lo cio hna lo i a tam deuh cu thla fatin in thlahlawh an hmu kho ti lo, tiah theih a si.
Lawngthantlang Khua I Biaknak He Aa Pehtlai Mi Buainak Kong Ah Lautu People Affairs Council Ceihmaihnak An Ngei>>>>>>>>>>
Chinram, Lautu hmunram, Lawngthantlang khua ah a cang mi biaknak lei buainak kong he pehtlai in ceihmainak an ngei i Lautu People Affairs Council (LPAC) nih hruaitu upa 9 hna he Coordination Committee an dirh, tiah theih a si.
August 27 ah tuah mi a voi khatnak Lautu People Affairs Council (LPAC) i a voi thumnak laakhruak tonbiaruah ah bia an khiah ning ah, hruaitu upa 9 hna he Coordination Committee an dirh i cu Committee nih cun ni 45 chung ah bia an khiah mi phunghram 7 cu an kalpi lai kong, LPAC nih August 28 ah cathanh an chuah.
Atu i an dirh mi Coordination Committee nih cun August 28 thawk in a ralai mi October 11 tiang ni 45 chung ah LPAC nih laakhruak tonbiaruahnak ah bia an khiah mi phunghram 7 cu an kalpi lai, tiah LPAC nih an langhter.
Coordination Committee nih bia khiah mi an kalpi cuahmah lio ah a lenglei phu an si ah, pumpak an si ah a herh lo ah i thlak ve lo ding in le Committee rianṭuannak dawnhkhanh i timh le biaknak kong buainak ah aa tel mi hna an limhang zorter i timh in huatnak a chuahter khotu thil tibantuk tuah hrimhrim lo ding in LPAC nih mizapi sin ah nawlnak an tuah.
A luancia August 15 ni ah khan Lautu hmunram, Lawngthantlang khua ah Khrihfabu kar ah buainak a chuah ruang ah chungkhar 10 in minung 50 hrawng cu khua in chuah an rak ton caah chuah a tong mi chungkhar ngaihchia in an ṭah lio Video cu August 18 ni ah Social Media ah a lar ngai i khat le khat i mawhchiatnak zong a rak chuak.
Hi kong he pehtlai in Lautu hmunram zatlang ukhruaitu phu nih cun, LPAC ah Agenda pakhat ah an chiah i ceihmainak kan ngei lai tiin August 19 ni ah a rak thanh hnu zarh khat hrawng a rauh ah Lautu People Affairs Council (LPAC) tonbiaruahnak ah telh in atu bantukin ceihmaihnak he a phichuak kawl hram an thawk, tiah theih a si.
Paletwa Peng Ah AA Nih Tlaih Mi Tualchung Mi Pahnih An Thlah Ṭhan Hna>>>>>>>
Chinram, Paletwa peng, Baungwi khua ah Rakhine ralkap AA nih an tlaih mi hna tualchung mi hna lak ah minung pahnih cu an thlah ṭhan cang hna, tiah tualchung mi pakhat nih a chim.
August 26 ni ah Paletwa khuapi thonginn ah AA nih an hren mi hna tualchung mi hna lak ah minung pahnih cu an thlah ṭhan cang hna i an umnak Baungwi khua ah himdam tein an phanh cang kong, anmah he naihniam in a um mi pakhat nih Kimo Media ah a chim.
“An thlah ṭhan cang hna i khoika hmanh ah an kal lo, khua ah an um ko. AA nih An thlah ṭhan mi hna cu Baungwi khua mi U Aung Nan le U Kyaw Win an si,” tiah anmah he naihniam in a um mi pakhat nih cun a chim.
Paletwa thonginn in luatnak a hmu mi pahnih cu a luancia May 17 ni ah khan Baungwi khua le Baungku khua ah siangcachim pahnih telh in tualchung mi 9 AA nih an tlaih mi hna lak ah aa tel ve mi an si.
Paletwa peng, Baungwi khua mi pahnih, Baungku khua mi pathum, Tamanthar khua mi le Teinlet khua mi 4, cun Sarchaung khua mi pahnih cu AA nih an hren rih ko hna, tiah theih a si.
Leave a Reply