Magway ramṭhen, Myaing peng, Thayetkwa khua ah SAC nih Pyudawhti le SAC ralkap pawl ca ah tiin an thlak mi tirawl cu PDF nih an laak kong, GOE Revolution Force in ṭuanvo ngei pakhat nih a chim.
Nizan August 30 ah Myaing peng, Thayetkwa khua ah a um mi Pyusawhti le SAC ralkap pawl ca ah SAC nih Y-12 vanlawng in tirawl fun 50 hrawng an thlaknak hmun ah PDF nih hmunram thianhfelnak an tuah caah kaphnih kar kahdohnak a chuak i SAC ralkap le Pyusawhti hliampu an um, tiah theih a si.
“SAC ralkap pawl hnu an tolh hnu ah SAC Y-12 vanlawng nih tirawl a thlak mi fun 50 chung ah cun, Facang, Pe, Ngacar, Kuak le Sanpioh chumh ding pawl an i tel. Hi vialte hi hmunram thianhfelnak kan tuahnak ah kan laak mi an si,” tiah GOE Revolution Force in ṭuanvo ngei pakhat nih a chim.
Thayetkwa khua hmunram thianhfelnak ah cun GOE Revolution Force, Damingyi hriamtlai phu, Bolinmywai hriamtlai phu, Bosati hriamtlai phu le Myaing Pah-Kah-Phah Company 4 an ṭangṭi, tiah theih a si.
Taungoo Peng Tilian Ah Tualchung Mi 10,000 Hrawng Har An Tong>>>>>>>>
Bago ramṭhen, Taungoo peng ah tilian a chuak i inn zeimawzat a phum caah tualchung mi 10,000 hrawng har an tong i zingzan eidin tirawl le an ngandamnak kong ah lungrethei ngaiin an um kong le zualral in bawmhchanh an herh kong, Save The Trees Rescue Team in ṭuanvo ngei pakhat nih a chim.
Taungoo peng ah pehtlai in zarh thum chung ruah fak ngaiin a sur caah Swa Dam ti a liam i August 27 ni thawk in khua cheukhat le sang cheukhat ah tilian a chuak. Tilian ruang ah Taungoo khuapi No.8, No.9, No.10, Ahlelkyun sang le Zeephyupin, Thahpanpin, Pyathaung, Htonebo, Chaungkan, Kanni khua cu ti nih a phum hna. Sittaung tivapi pawng i a um mi khuate cheukhat zong ti nih a phum hna, tiah Save The Trees Rescue Team in ṭuanvo ngei U Kyaw Thura nih a chim.
“Khuate lei pawl hi a hlei in bawmhchanh an herh. Ti a lianh tuk caah kal awk a har ngai. Cuka khua lei ah cun dinti thiang a um lo caah tualchung mi 20 hrawng chungtlik in an zaw. Rai dang in a zaw mi zong an um i zualral in dinti thiang, eidin tirawl le sii-ai bawmhchanh an herh. Taungoo khuapi chung ah i dornak Camp 6 kan sak i minung 2,350 hrawng an i dor,” tiah U Kyaw Thura nih cun a chim.
Leave a Reply