Ukraine ram lai ah a um mi Poltava khuapi ah Rassua ralkap nih Missile hriamngan an kah ruang ah minung 51 an thi i 270 leng hliam an tuar, tiah ṭuanvo ngeitu nih an chim.
Russia ralkap Missile hriamngan kah ruang ah Poltava khuapi hrambunh ralkap training sianginn le a pawngkam i a um mi siizungpi pakhat a rawk. A thi mi hna lak ah Ukraine ralkap sii lei rianṭuantu zong an i tel, tiah an chim.
Vanlawng in kahdohnak tuah an timh tiin thawngpang a chuah hnu ah Poltava khuapi i a um mi pawl cu lungkhur chung ah i dup ding in caan an ngei manh hna lo, tiah Ukraine Defence Ministry nih an chim.
Poltava khuapi kahdoh a ton mi kong ah Ukraine President Volodymyr Zelensky nih cun, vanral in i kham khawhnak System le Missile hriamngan bawmhchanh ding in nitlaklei hriamtlai ṭangṭi phu pawl a nawl hna.
Poltava khuapi kahdohnak kong he pehtlai in Russia nih zeihmanh an chim mi a um rih lo. Russia ram hrambunh Media pawl nih cun, Missile kah lio ah ralkap training sianginn ah Cadet pawl a bu in an um lio a si, tiah an thanh nain Ukraine ralkap nih a dik lo mi a si tiin an hnon ve.
Ukraine ram ah kahdohnak a chuah hlan ah Poltava khuapi ah minung sing 3 leng an rak um. Poltava khuapi kahnak kong ah Russia cu US, British le Germany nih fak piin an mawhchiat.
Tlangcung Hriamtlai Phu Pawl Nih An Laak Mi Hmunram Ah Fak Piin Kahdohnak Kan Kalpi Lai — Min Aung Hlaing>>>>>>
Tlangcung hriamtlai phu pawl nih an laak mi hmunram ah biatak tein fak piin kahdohnak kan kalpi cang lai caah cuka hmunram i a um mi paoh rak i ralring u, tiah Min Aung Hlaing nih nizan September 3 ah Taunggyi khuapi ah a chim.
“Myanmar ram chung ramkhel kong buainak cu caan ṭha ah rak i laak riangmang in hmunram kauh an i timh mi zong hmuh khawh a si. Atu lio ah tlangcung hriamtlai phu pawl nih khuapi le khuate an laak hna i SAC ralkap khamnak ca ah tualchung mi umnak inn, ukhruaitu umnak inn le minung kalnak hlei an hman i hmun dang ah ralzaam in aa dor mi pawl zong kir ṭhan ding in an lemsoi hna. Cu pin ah ralkap tla ding ah mithar zong an khawmh hna,” tiah Min Aung Hlaing nih a chim.
“SAC nih cun rampi nawlngeihnak cu a si khawh chung in kan humzual lai i tlangcung hriamtlai phu pawl an thawngpang le an dirhmun zohchih in a herh ning in teirulchamnak he kahdohnak fak piin kan kalpi cang lai caah tlangcung hriamtlai phu pawl nih an laak mi khuapi le khuate i a um mi tualchung mi zong ralring tein um an herh,” tiah SAC Chairman nih cun a chim.
SAC nih MNDAA, TNLA le AA cu ralhrang phu an si tiin September 2 ah an thanh i anmah he aa pehtlai mi le a ṭangṭi mi paoh cu ralhrang a dirkamh i tha a petu an si, tiah Min Aung Hlaing nih Taunggyi khuapi ah a chim.
Leave a Reply