Thailand ram ah tlaih a tong mi Myanmar ram mi 1,000 deng cu a luancia August thla chung ah khan Thailand ram nawlngeitu pawl nih kanmah sin ah phungning tein an rak ap hna. Pa 752 le nu 208 tiin an zate ah minung 960 an si i ramri Gate in kan sin ah an phan, tiah SAC nih nizan September 5 ah an thanh.
Thailand cozah nih Myanmar ram ah a kuat mi hna Myanmar ram mi 960 cu an umnak hmun cio ah maw an kirter hna lai, asiloah an hren hna lai dah ti cu SAC nih an thanh mi ah an langhter lo.
A luancia July le August thla chung ah Thailand cozah nih Ranong thonginn in an thlah mi hna Myanmar ram mi 71 cu Kawthoung tilawng dinhnak ah SAC ralkap nih ralkap tlakter ding ah an tlaih hna, tiah chungkhar lei nih an chim.
Myanmar ram buai ruang ah Thailand ram ah a zaam mi Myanmar ram mi nuai 6 leng an um i Thailand cozah nih ni 120 chung ah Myanmar ram mi 155,669 an tlaih hna kong, Thailand Labor Ministry nih August 24 ah an thanh.
Kalaymyo In Falam–Hakha Motor Cit Man Kyats Sing 1 A Phan>>>>>>>>
Sagaing ramṭhen, Kalaymyo in Chinram chaklei Falam–Hakha kar motor cit man minung pakhat ah Kyats sing 1 tiang a phan i Kalaymyo–Tedim khuapi tiang ah Kyats 80,000 tiang a phan, tiah tualchung mi nih an chim.
Motor man kong he pehtlai in September 3 tiang i motor ngei pawl nih an chim ning ah, Kalay–Hakha kar cu Kyats sing 1, Hakha–Kalaymyo zuan lei cu Kyats 80,000.
Kalay–Falam kar cu Kyats 80,000, Falam–Kalaymyo zuan lei cu Kyats 70,000, Kalaymyo–Rihkhawdar khuapi kar cu Kyats sing 2 a phan.
“A luancia June thla hramthawk in hmunram zohkhentu hriamtlai phu pawl nih Taingen lamṭhen an on ṭhan hnu ah a hlan bantukin motor lampi hman khawh a si ko nain Petrol le Diesel man a fah tuk caah le lampi hman man a fah tuk caah motor cit man kaiter lo awk a ṭha lo. Kalaymyo in Chinram lei voi khat kai ah a tlawm bik Kyats sing 4 hrawng kan dih,” tiah ṭuanvo ngei pakhat nih a chim.
Atu hrawng cu Hakha–Kalay–Yangon lampi hman a ngah hnu in Hakha le Kalay kar a zul mi an tam deuh. Hakha–Kalay–Yangon lampi motor cit man ah Kyats 240,000 a dih, tiah tualchung mi pakhat nih a chim.
Leave a Reply