Shan ramkulh chaklei, Wa mahte khuakhan lairel hmunram, Panghsang khuapi le Mongpawk khuapi ah nizan September 9 zinglei in ruah fak ngaiin a sur ruang ah tilian a chuak i a niam deuhnak hmun cu ti nih a phum kong, tualchung mi nih an chim.
“Panghsang ah nizan zing khan ruah fak ngaiin a sur i ti a lian colh. Zan tu ah cun ti a zor deuh. Panghsang–Mongpawk lampi a min dih i hman a ngah cang hnga dek maw, ṭuanvo ngeitu nih cun remh an timh ko. Panghsang nakin Mongpawk ah a zual deuh. Tlakrawh inn dot khatnak tiang hi cu a phum dih,” tiah tualchung mi pakhat nih a chim.
“Mongpawk khuapi zong ah ti a lian ngai. Panghsang le Mongpawk lampi a minh caah kal awk hrim a ṭha lo. Mongpawk ah hin atu bantukin ti a lian bal lo. Khua leng i thingkung kan humhalh mi an hau dih hnu in tilian nih a kan phanh ve,” tiah a dang tualchung minpakhat nih a chim ve.
Tachileik ah hin atu le atu in ti a lian lengmang i Tachiliek hmunram cheukhat le khuapi chung cheukhat ah ti a kai ngai cang i atu hnu ni khat ah cun biatak tein ti a lian kho mi a si caah Tachileik peng chung tivapi kam i a um mi le a niam deuhnak hmunram i a um mi tualchung mi cu ralring tein an um a herh kong, SAC khuacaan zohnak zung nih an thanh.
Shan Ramkulh Chaklei Ah Khazianchinti Cuai Khat Ah Kyats 300 Lawng A Si Caah Lotho Rianṭuan Sunghzatlak An Tong>>>>>>
Shan ramkulh chaklei ah lothlo rianṭuan mi nih pawcawmnak ca ah i hmaithlak in an ṭuan i an thar mi Khazianchinti cu cuai khat ah Kyats 300 lawng in an zuar khawh caah lothlo rianṭuan pawl nih sunghzatlaknak an tong, tiah theih a si.
Shan ramkulh thlanglei, Kalaw peng, Aungpan ah a chuak mi Khazianchinti cu a tlai tam ngai nain Myanmar ram hmun kip ah kahdohnak a fah caah lamhla ah an kua kho lo i cuai khat ah Kyats 300 lawng in an zuar khawh, tiah tualchung mi pakhat nih a chim.
“Cheukhat Khazianchinti hmun ngei pawl cu Agent pawl nih an laakpiak hna lo ahcun hlonh sawh in hlonh an hau. A thutman awl in caan sau i chiah awk zong a ṭhat lo caah an hlonh sawh tawn. A hring deuh mi hi cuai khat ah Kyats 300 a si i a hmin ṭha deuh mi cu cuai khat ah Kyats 500 a si,” tiah tualchung mi pakhat nih cun a chim.
A luancia July thla chung ah cun Khazianchinti man cuai khat ah Kyats 2,500 a si nain August thla chung ah Kyats 1,000 ah a tla. September zarh khatnak in cuai khat ah 300 lawng ah a tla, tiah theih a si.
Leave a Reply