Ngakchia 16 Telh In Tualchung Mi 120 Leng Nunnak A Liam

SAC Ralhrang Kut In April Thla Chung Ah Ngakchia 16 Telh In Tualchung Mi 120 Leng Nunnak A Liam. Hramhram in nawl ngeihnak a latu SAC ralhrang kut in 2024, April thla chung lawng ah ngakchia 16 telh in Myanmar ram tualchung mi 120 leng an nunnak a liam, tiah ramkhel lei thongtla bawmchantu phu (AAPP) nih an thanh.

SAC ralhrang ruang ah nunnak liam mi hna cu pa 88 le nu 33 an si i an dihlak fonh minung 121 an si, cu chung ah kum 18 tang thah a tong mi minung 16 le kum 60 in a cunglei minung 15 zong an i tel, tiah theih a si.

Atu bantuk in nunnak liam mi hna lak ah minung 38 hi Sagaing ramṭhen tualchung mi hna an si i a tam biknak hmun a si. SAC ralhrang nih cunglei kahdohnak a tuah mi ruang ah minung 42 nunnak a liam.

April thla chung lawng ah SAC ralhrang nih Myanmar ram tualchung mi 38 an tlaih hna i cu chung ah kum 6 ngakchia 2 zong an i tel. Tlaih a tong mi hna cu nu 14 le pa 24 an si, tiah a langhter.

SAC ralhrang nih nawlngeihnak a laak thok in 2024, April 30 tiang ah ralhrang kut in Myanmar ram tualchung mi 4,957 nunnak a liam cang i an tlaih mi hna minung 26,588 an si cang. Cu chung ah 20,375 hi nihin tiang an thlah rih hna lo pin ah minung 8,955 cu kum caan sau thongthlak ding in bia an khiahpiak hna, tiah AAPP nih an langhter chih. Lungmili Post

Thawngpang dang: Kyindwe Khuapi SAC Sakhan Cu Chin Brotherhood Nih An Laak Kong An Thanh. Kanpetlet peng, Kyindwe khuapi um SAC ralkap sakhan cu Chin Brotherhood le hriamtlai phu dang hna fonh in April 29 ah an laak kong Chin Brotherhood nih an thanh.

“Kanpetlet peng, Kyindwe khuapi SAC ralkap sakhan cu a luancia December 22, 2023 in CDF-Kanpetlet, CDF phufonh le PDF hna nih kan rak kah i hriamnam le thilri tel in harsatnak tampi lak ah thla-thum deng din lo in kan kah hnu ah, 7 March 2024 thawk in Chin Brotherhood Operation min bunh in hriamtlai phu dang hna he i bawm in kan pehzulh. Ni 54 kan rauh hnu, April 29 zing suimilam 9:30 ah sakhan cu a ning piin kan laak khawh pin ah hriamnam le thilri zong tampi kan laak” tiah Chin Brotherhood nih cathanh an chuah.

Thla 4 leng Kyindwe SAC ralkap sakhan kahdohnak ah bawmchantu mizapi le kan ralkap pawl an ralṭhatnak le nawlngaihnak cung ah Chin Brotherhood nih upatnak kan in pek hna i, kahdohnak ah nunnak le takpum a petu ralkap nan dihlak Chin Brotherhood nih thinlung dihlak in upat kan in pek hna, tiah an cathanh ah cun an langhter.

Hi kahdohnak ah hin Chin Brotherhood, PDF, YDF, GZA le LPDF hna an i tel, tiah theih a si.Crd: THECHINPOST