Tedim Peng CNA le ZRA Kar Kahdohnak Ah CNA Ralkap Pakhat Nunnak A Liam.Tedim peng, Laitui khua pawng ah nihin May 1 zing suimilam 12 in 4 tiang Chin National Army (CNA) le Zomi Revolutionary Army (ZRA) kar kahdohnak a chuak i CNA lei in ralkap Salai Van Hoi Thang nunnak a liam, tiah Zalen nih a ṭial.
Laitui khua cu Rihkhuadar le Tedim kalnak lam ramri ah a um mi a si i cuka hmun ah cun a luancia caan zong ah CNA le ZRA an rak i kap cang.Hi kong he pehtlai in CNA lei cu pehtlaihnak kan tuah hna nain an phone a lut kho lo. Kahdohnak kong he pehtlai in kaphnih in thawngthanhnak an tuah mi a um lo i ZRA lei thi le hliam an um le um lo theih a si lo.
Good News :Chin Immanuel Church, Sangau Nih CNF/CNA Ca Ah Bawmhnak An Pek.Mizoram ramkulh, Lawngtlai pengkomh, Sangau khua ah hrambunh mi Chin Immanuel Church nih CNF/CNA cu bawmhnak an pek hna.Chin Immanuel Church, Sangau nih cun CNF/CNA cu Facang – bags 60, Chiti – box 5, Dal – bags 3, Khachuansen – bags 1, le Alu – bag 1 an bawmh hna.
CNF/CNA nih Chin Immanuel Church, Sangau sin in bawmhnak an hmuh mi kong ah, “Chinram le Miphun dawtnak lungput nganpi ngei in CNF/CNA ca ah tiin nan rak pekchanh mi hna cu tlamtling tein kan hmuh i kan i lawm tuk hringhran. Hi nan pekchanhnak hi kan ram le kan Miphun tuanbia nih a philh lai lo. Hmailei nan rianṭuannak le nan cawlcanghnak ah Bawipa Pathian nih lam in hruai hna seh law thluachuah vanluh in ṭhumhthlak ko hna seh, tiah CNF/CNA nih thluachuah ham thlaza campiak bu in lunglawmhnak ca kan in kuat hna,” tiah an lunglawmhnak an langhter.
Thawngpang Dang Rak Rel Chih :Ramri Lonh Kahdohnak Kong Ah Chin Hriamtlai Phu Unau Nih CNF/CNA Ralrin An Pek.Chin hriamtlai phu unau(Chin Brotherhood) nih Kyindwe khuapi an laak i hmunram thianhfelnak an tuah cuahmah lio ah caan ṭha rak i laak riangmang in CNF/CNA hruai mi Chinland Council tang um ralkap hna nih hmunram ngeitu tualchung hriamtlai phu lungtlinpinak tel lo in Chin hriamtlai phu unau uk mi hmunram chung ah lut in kahdohnak kalpi an timh mi kan hmuh caah kan duh hrimhrim lo, tiah Chin hriamtlai phu unau nih nihin May 1 ah ralrin peknak cathanh an chuah.
Chin hriamtlai phu chungtel a si mi ZFU/PDF-Zoland le CNO/CNDF hna nih an hmunram chung um mi khuapi laak ding ah a ṭha bik in kahdohnak kalpi an timh lio ah CNF/CNA nih cu i timhlamnak cu hnahnawhnak pek le ramri lonh in pehzulh in kahdohnak kalpi a timh mi cu tualchung buainak a karhtertu a si i khat le khat kar ah thisen a luannak a canter kho mi a si, tiah Chin hriamtlai unau nih an langhter.
Chin hriamtlai phu unau nih cun, “CNF/CNA hmunram a si mi Hakha le Thantlang khuapi hna khi papek in laak i timh ding a si, a herh ahcun Chin hriamtlai phu nih kan i kahdohpiak hna lai, cu si lo in hmunram lonh ṭhan nan i timh ahcun Chinmi kar ah lungrualnak a tlau lai i thisen tiang a luang kho mi tuanbia a chuak sual lai,” tiah ralrin peknak an tuah.
Chinmi khat le khat kar ah kahdohnak a chuah lo nakhnga atu le atu in ralrin peknak tuah ko bu in hmainor in ramri lonh in kahdohnak nan tuah ahcun Chin hriamtlai phu unau nih ralrin peknak kan tuah cang bantukin ramri lonh in a cawlcang mi paoh cu kan kahdoh cang hna lai, tiah Chin hriamtlai phu unau nih ralrin peknak cathanh an chuah mi ah an langhter.
Ramri lonh kahdoh kong ah ZFU/PDF-Zoland nih a luancia April 17 ni ah CNF/CNA cu ralrin peknak an rak ngeih cang i, CNO/CNDF zong nih April 24 ni ah anmah pumpak in ralrin peknak cathanh an rak chuah ve cang, cu hnu ah nihin May 1 ah Chin hriamtlai phu unau min in ralrin peknak an tuah ṭhan.
Ramri lonh kahdoh kong he pehtlai in CNO/CNDF chimnak nawlngei Salai Timmy Htut nih cun, “CNF/CNA zong ṭha tein ca kan kuat hna i hramhram in kan hmunram chung ah cun kahdohnak an tuah ding cu kan zum lo, CNO/CNDF Chief of Staff(CS) le CNA Chief of Staff(CS) zong tonnak an ngei cang i kan kar ah buainak zeihmanh a um lo, a ṭha dih ko,” tiah nizan April 30 ah The Chin Post ah a chim. Hi kong ah CNF/CNA lei nih cun cathanh an chuah mi a um rih lo.Credit : The Chin Post
Leave a Reply