Falam Khuapi Pawng Kahdohnak Ah CNDF Nih SAC Ralkap Pakhat An Hrilh.Chinram, Falam khuapi pawng ah nihin May 13, chun suimilam 12:30 hrawng ah SAC ralkap le CNDF kar kahdohnak a chuak i SAC ralkap pakhat hmunril ah a thih kong CNDF in chimnak nawlngei Salai Timmy Htut nih The Chin Post ah a chim.
“Nihin chun suimilam 12:30 hrawng ah khan SAC ralkap duty in aa chawk mi le kan naule cu i tong in kaphnih kar kahdohnak a chuak i SAC ralkap pakhat a thi, an i kah caan hi a sau lem lo, SAC ralkap pawl hnu an tolh i kaphnih i kahnak a dai ṭhan. SAC ralkap thi mi pakhat a um ruang ah an duhnak paoh ah meithal an kah caah kum 7 ngakchia pakhat hliamhme a tuar, atu cu boruak a dai cang ko,” tiah CNDF in chimnak nawlngeitu nih cun a chim.
A liamcia 2023 December 18 ni zong ah Falam khuapi, Cimmual sang chung ah CNDF le SAC ralkap kar kahdohnak a rak chuak i, cu ni ah cun Falam khuapi lai lamtonnak ah SAC ralkap Captain pakhat cu CNDF nih an rak fimhlawm.
Rak Rel Chih :Tonzang Peng Ah SAC Nih Bomb An Thlak I Biakinn Pahnih A Rawk.Chinram, Tonzang peng Lungtak khua ah May 11 zan, suimilam 9 hrawng ah khan SAC nih vanlawng in bomb an thlak i Biakinn pahnih le tualchung mi umnak inn panga(5) a rawk, tiah theih a si.
Tonzang peng chung ah hin Chin National Army(CNA), ṭangṭi phu le Zomi Revolutionary Army(ZRA) kar kahdohnak a fak i Tonzang khua luhchuahnak cu SAC ralkap nih an khar. Vanlawng nih bomb a thlak hlan ah Lungtak, Phaitu le Nakzang khua in tualchung mi thongkhat hrawng cu a himnak hmun ah an i dor hna, tiah theih a si.
“Kahdohnak a chuak lai ti kan theihnak a sau cang caah minung thong khat hrawng cu kan rak zaam chung cang i vanlawng nih bomb a thlak lio ah hliam tuar kan um lo,” tiah tualchung mi pakhat nih a chim.Vanlawng bomb thlaknak ruang ah hin Roman Catholic Biakinn pakhat, Zo Baptist Church Biakinn pakhat le inn 5 a rawk, tiah Chin Human Rights Organisation(CHRO) nih an langhter.
Thawngpang Dang Rak Rel Chih :Tamu Peng, Myothit Khuapi Cu Ṭangṭi Phu Nih An Laak, SAC Palik 21 Nih An Hriamnam An Chiah.Sagaing ramṭhen, Tamu peng, Myothit khuapi cu tualchung hriamtlai ṭangṭi phu nih an laak i SAC ralkap 21 nih hriamnam chiah in an i ap kong cu No.1 ral hmunram um mi nih an thanh.
A luancia May 7, zinglei suimilam 5:00 in May 11, zinglei suimilam 10:00 tiang Tamu peng, Myothit khuapi ah umhmun a khuar mi Khah-Lah-Yah 228, SNA Brigade 891(Battalion 3), Meitei hriamtlai phu, SAC palik le Pyusawhti zate fonh minung 250 hrawng cu tualchung hriamtlai ṭangṭi phu nih an kah hna, tiah theih a si.
Cu kahdohnak ah cun SAC palik 21 nih thantar raang mi thlai in an hriamnam an chiah i SAC ralkap thi le hliampu mi zat belte fehter khawh a si rih lo, hriamnam chiah in aa ap mi lak ah sakhan uktu palik bawi Kyaw Kyaw Naing, palik bawi chang Kyaw Kyaw Lwin le Myo Thant zong an i tel, tiah theih a si.
Myothit khuapi kahdohnak ah cun Tamu pengkomh Command hruainak in Tamu pengkomh Battalion 2, Special Force Battalion 9, Kuki National Army(KNA), National Liberation Army(NLA) hna an ṭangṭi i, SAC ralkap hman mi hriamhme 29, 60mm lung 12, Inaga lung 5, Bomb lung 1, Station Jammer 3, kuanbawm 34 le kuanfang tam ngai an laak, tiah theih a si.Credit : The Chin Post
Leave a Reply