Myanmar ram in a hmasa bik UFC ah aa ṭhua mi Chin pa Salai Joshua Van cu a ra lai mi 2024, Jun 15 ah Russia ram mi Tagir Ulabekov he an i ṭhua ṭhan lai, tiah theih a si.
Salai Joshua Van cu Tsuru Taira he June 2 ah an i ṭhua lai tiah an rak fehter cang nain nihin May 14 zing ah Russia ram mi Tagir Ulabekov he i ṭhuat ding in an thlen ṭhan.
Salai Joshua Van he aa ṭhua ding mi Tagir Ulabekov (Kum 32) cu “UFC Flyweight Ranking” rikhiah mi ah No.12nak ah aa tel mi a si. Voi 17 tiang UFC aa ṭhuatnak ah voi 15 teinak a hmu i voi 2 a sung, tiah theih a si.
Slai Joshua Van cu UFC ah voi 3 aa ṭhua cang i a voi 3 ning tein teinak hmutu a si.
Salai Joshua Van cu a voi khatnak ah Lucas Rocha he i ṭhuat ding in an rak fehter nain Lucas Rocha cu a chuak i Su Mudaerji he i ṭhuat ding in an fehter ṭhan hnu ah Su Mudaerji zong a chuak ve. A voi 3nak ah Tsuru Taira he an fehter ṭhan hnu ah UFC ṭuanvo ngeitu hna nih a voi 4nak Russia ram mi Tagir Ulanbekov he i ṭhuat ding in minung an thlen ṭhan, tiah theih a si.>>>>>>>
Yaengan Khua Pawng Kahdohnak Ah SAC 1 A Thi, Ralhrang Nih Yaengan Khua Mi 1 An Thah I Minung 30 Leng An Tlaih Hna
Pago ramṭhen, Letpadan Peng, Yaengan khua pawng ah SAC ralhrang le PDF karlak ah kahdohnak a chuak i ralhrang 1 a thi, SAC nih Yaengan khua an luhhnawh i tualchung mi pakhat an thah pin ah midang 30 leng an tlaihkhih hna, tiah Thayarwaddy pengkomh PDF chung in ṭuanvo ngeitu pakhat nih Khit Thit Media ah a chim.
2024, May 13 zing suimilam 7:00 tluk ah Letpadan Peng, Yaengan khua pawng ah SAC ralhrang le PDF karlak ah kahdohnak a chuak i ralhrang 1 a thi, midang 10 leng nih hliam an tuar, SAC nih hriamngan an kah caah khuate 4 in tualchung mipi cu hmunhimnak ah an zaam hna tiah theih a si.
Kahdohnak a dih hnu ah SAC ralhrang nih Yaengan khua an luhhnawh i tualchung mi pakhat an thah pin ah hmunhimnak ah a zaam lo mi 30 leng ralphaw ah an tlaihkhih hna tiah theih chih a si.>>>>>>>>>>>>>>
Chiang Mai Ah Phungning Lo Lut Myanmar Ram Mi 27 An Tlaihkhih Hna
2024, May 13 ah Thailand ram, Chiang Mai khuapi ah phungning lo lut Myanmar ram mi 27 an tlaihkhih hna tiah Chiang Mai pengkomh mipem lut hna zohkhenhtu phu nih an langhter.
Chiang Mai pengkomh, Changkalan pengkomh ramṭhen ramdang mi rianṭuantu an tam biknak hmun 6 cu ṭuanvo ngeitu hna nih an luhhnawh i phungning lo lut minung zeimawzat an tlaihkhih hna tiah RFA nih a langhter.
Leave a Reply