21 May 2024
Chinram, Tonzaang khuapi cu nihin May 21 zing ah Chin hriamtlai ṭangṭi phu nih an laak i SAC ralkap hman mi hriamnam 50 leng an laak kong CNF/CNA in chimnak nawlngei Salai Htet Ni nih a chim.
“Nihin zinglei ah Tonzaang khuapi cu a ningpi in an laak cang, SAC ralkap nih an hman mi hriamnam 50 hrawng zong an laak khawh, SAC ralkap cheukhat cu an zaam i hmunram thianhfelnak an tuah lio, atu cu Tonzaang khuapi cu SAC ralkap an um ti lonak hmun a si cang,” tiah CNF/CNA in chimnak nawlngei Salai Htet Ni nih cun a chim.
A luancia May 19 ni ah Chinram, Tonzaang peng, Cikha khuapi um SAC ralkap sakhan vialte an laak dih hnu ah khuapi a ningpi in CNA le CDF ṭangṭi phu nih an rak laak, nihin May 21 zinglei ah Tonzaang khuapi an laak ṭhan i Tonzaang peng a ningpi in Chin hriamtlai ṭangṭi phu nih an laak dih cang.
A luancia May 15 ni ah thawk mi Tonzaang khuapi kahdohnak ah SAC ralkap thi le hliampu mi an tam i tlaih mi zong an um, cu kahdohnak ah cun SAC ralkap nih vanlawng in kahdohnak an tuah i bomb an thlak caah tualchung mi zong a himnak hmun kawl in ral an zaam, tiah theih a si.
Nizan May 20, zanlei suimilam 5:30 hrawng ah khan CNA le CDF ṭangṭi phu nih Thantlang SAC ralkap sakhan cu hriamngan le tanglei in meithal he an kah hna, cu kahdohnak ah cun CDF-Thantlang in ralkap pakhat hliam fak tuk lo a tuar, SAC ralkap lei in thi le hliam an um le um lo kong fiang in theih a si rih lo kong CDF-Thantlang GS Salai Khamh Pek Lian nih The Chin Post ah a chim.
Magway ramṭhen, Yesagyo peng chung um khuate 3 le PDF sakhan cu SAC ralhrang thazaang 300 leng nih an luhhnawh nain dohthlennak hriamtlai ṭangṭi phu nih an kah hna caah ralhrang 32 an thi, tiah Southern YSO PDF chung in nawlngeitu Aung Mawng nih Khit Thit Media ah a chim.
2024, May 17 zing suimilam 5:10 tluk ah Yesagyo peng chung um khuate 3 le PDF sakhan pakhat cu Pakokku 101 le a kuttang um Khah-Lah-Yah 235-257-258 in SAC ralhrang thazaang 300 leng nih an luhhnawh hna nain dohthlennak hriamtlai ṭangṭi phu nih an kah hna caah ralhrang 32 an thi, meithal 9 an laak tiah theih a si.
2024, May 17 zing suimilam 5:10 tluk ah Zeetaw, Kyaukhtet, Theataw le Southern YSO PDF sakhan hmunhma 4 cu SAC ralhrang nih hriamngan le hriamhme he luhhnawh in an kah nain dohthlennak hriamtlai ṭangṭi phu nih rakbawh in an kah ve hna caah ralhrang 22 an thi, tiah kan theih.
2024, May 18 zaan suimilam 12:00 tluk ah Southern YSO PDF sakhan ah SAC ralhrang thi mi ruak cu motor 2 in an rak laak hna tiah an langhter.
Cu bantuk ṭhiam in 2024, May 17 zing suimilam 7:25 tluk zong ah hnu kir mi SAC ralhrang rallam 2 cu dohthlennak hriamtlai ṭangṭi phu nih hmaitonh in an kah hna caah ralhrang 10 an thi ṭhan, meithal 9 an laak chih tiah theih a si.
SAC ralhrang thi mi ruak pawl cu a tutiang in an la rih hna lo SAC kut chung in MA1 3, MA2 1, MA3 1, G3 4 le hriamnam dang zeimawzat an laak chih tiah kan theih.
Leave a Reply