Russia Le Belarus Vanlawng IL 76 Cu Naypidaw Ah Ṭum In Hriamnam A Thlak

Russia le Belarus ram in thilphur vanlawng IL 76 nih Naypyidaw vanlawng bual ah hriamnam an vun chiah, tiah theih a si.
Russia in aa thawh mi IL 76 vanlawng cu nizan May 24, zaan suimilam 11:50 ah Naypyidaw vanlawng bual ah a ṭum i nithum in nili kar a caam hnu ah a kir ṭhan lai, tiah Naypidaw thawnglaknak hrimpi nih an chim.

Cu bantuk in nizan May 24 ṭhiam ah Belarus ram in Russia thilphur vanlawng IL 76 cu Naypyidaw vanlawng bual ah a ṭum ve i nihin May 25 zing ah a tlung ṭhan lai.
May 21 zong ah Russia thilphur vanlawng IL 76 pakhat nih Naypyidaw ah hriamnam a rak chiah hnu ah a kir ṭhan colh, tiah theih a si.

Falam Khuapi Chung Kahdohnak Ah SAC Ralkap Pakhat Hliam A Pu>>>>>>>>>

Nizan May 23, zanlei suimilam 3:00 hrawng ah Falam khuapi chung Construction zung pawng ah a um mi SAC ralkap pawl cu CNDF nih va fuh in an kah hna i SAC ralkap pakhat a liang ah an hliamh, tiah kan thawnglaknak nih a chim.

Hi kong he pehtlai in CNDF chimnak nawlngei AGS-1 Salai Timmy Htut nih cun, “Falam khuapi chung kahdohnak hi a dik mi a si ko, atu hrawng cu hi bantuk tete a cang pah lengmang,” tiah The Chin Post ah a chim.

Cun, Falam khuapi um tualchung mi pakhat nih, “Atu hrawng cu kahdohnak tete a um pah, SAC raltuknak vanlawng(Jet Fighter) zong nih atu le atu in a kan hel i, chun he zan he a kan hel ko, nihin zong zanlei sml 4:00 hnu hmanh ah voi hnih a ra cang, a luancia May 22, zan suimilam 10:00 tiang ah voi 5 hrawng a rak kan hel,” tiah a chim ve.

A luancia May 13 ni zong ah Falam khuapi chung ah bomb hmanh ding in a kal mi SAC ralkap le CNDF kar kahdohnak ah SAC ralkap pakhat a thi. Cu bantuk ṭhiamṭhiam in a liamcia 2023 December 18 ni ah CNDF ralkap nih Falam khuapi chung ah SAC ralkap pakhat an rak fimhlawm, tiah theih a si.