Magway ramṭhen, Gangaw hrambunh LIB 50 nih hriamngan an kah caah mipi 3 an thi i hngakchia 2 telh in 4 an i hliam tiah Gangaw peng mipi uknak phu nih an thanh.
May 26 zinglei sml 10:00am hrawng ah LIB 50 in an kah mi hriamngan 2 cu Aungmin khuate um mipi inn cung ah a tla i a puah caah mipi an thih le hliam an tuar hi a si tiah an langhter.
Hliam a tuar mi chung ah thla 8 hngakchia 1, kum 4 hngakchia 1 le kum 68 upa pakhat an i tel tiah Yaw Alindan zong nih an langhter.
Hliam a tuar mi hna hi an nunnak cu thinphan awk a um lo tiah theih a si.
Gangaw peng, May 16 zong ah Myaukkhinyan khua in SAC ralkap le pyusawhti pawl nih Yethar le Shwebo khua hna ah lut in mipi 2 an thah hna leng ah mipi inn 300 hrawng zong an khangh tiah Gangaw peng mipi uknak phu nih cun an thanh.
Gangaw pengkomh chung a um mi Saw peng, Agyipanpalwin khua le Ṭawma khua hna cu May 19 le May 14 ah SAC nih van lei in kahdohnak a tuah i mipi 25 nak tlawm lo an thi, 40 hrawng an i hliam tiah theih a si.
SAC Ralkap Nih Tedim Khua An Khangh>>>>>
Chin ramkulh, Tedim khua cu May 26 thawk in nihin tiang kahdohnak a fak i SAC ralkap lei nih Tedim khua mipi inn pawl an khangh tiah theih a si.
May 27 zaanlei sml 4:00pm hrawng thawk in SAC ralkap nih Tedim khua, Myoma sang mipi inn pawl an khangh hi a si i zaanlei sml 5:00pm tiang a kang rih tiah Zalen nih a langhter.
Nizaan zaanlei thawk in Tedim khuachung ah kahdohnak a fah caah Tedim mipi a za in an zaam tiah theih a si.
Tedim Khuachung Ah Kahdohnak A Chuak, SAC Nih Van Lei In Kahdohnak A Tuah>>>>>>>
Chin ramkulh, Tedim khuachung ah May 26 zaanlei thawk in nihin zinglei tiang kahdohnak a chuak i SAC nih van lei in kahdohnak a tuah caah mipi an i hliam leng ah biakinn le mipi inn pawl zong a rawk tiah theih a si.
Tedim khuachung um SAC ralkap sakhaan pawl cu PDF-Zoland le Chin Brotherhood phu nih an kah hna hi a si tiah khuami nih an chim.
Kahdohnak ruang ah May 26 zaanlei le nihin (May 27) zinglei ah van lei in bom a thlak i mipi 2 fak ngai in an i hliam tiah khuami pakhat nih Khonumthung Burmese ah a chim.
“A biapi in Laylone, Lay-taw-tan sang le SAC ralkap nih hmunhma an khuar nak hmunhma pawl ah kahdohnak a chuak, SAC lei nih Y12 in voi 8 bom a thlak. Tuzing ah Jet vanlawng in voi 3 bom a thlak, mipi inn tampi a rawk, CCJ Hall zong a rawk ngai” tiah Tedim khuami nih Khonumthung Burmese ah a chim.
Tedim khuachung ah kahdohnak tuah lo ding in khuami cheukhat nih a luancia ni tlawmpal ah khuachung lampi hna ah a bu in thla an cam in an i chawk.
Kahdohnak a chuah hlan ni tlawmpal ah Tedim khuachung um SAC ralkap sakhaan pawngkam a um mi mipi le khuami cheuli cheukhat cu an zaam bantuk in kahdohnak a chuah hnu ah khuapi ning ngawt in an zaam hna tiah theih a si.
Tedim khua ah Tonzang khua in ralzaam 3,000 leng an i dor nain atu bantuk in kahdohnak ruang ah an zaam chap hna tiah theih a si.
Leave a Reply