Chinram, Tedim khuapi kahdohnak ah Chin hriamtlai phu unau nih SAC ralkap pawl umhmun an khuarnak Nah-Tah-Lah zung, siizung le palik zung an laak cang kong tualchung mi nih an chim. Tedim khuapi chung kahdohnak ah cun SAC ralkap nih vanlawng in kahdohnak an tuah i khuachung ah bomb an thlak pin ah timh ciammam tein inn an khangh i kaphnih kar kahdohnak a fak, tiah theih a si.
May 26, zan suimilam 10:00 hrawng in Chin hriamtlai phu unau nih Tedim khuapi laak ding in kahdohnak an thawk i Tedim khuapi chung SAC ralkap umhmun khuarnak Nah-Tah-Lah zung, siizung le palik zung cu an laak cang, SAC ralkap pawl nih Khah-Lah-Yah 269 ah ralkap thazaang chap in kahdohnak an pehzulh ve i vanlawng in khuapi chung ah bomb an thlak pinah nizan zanlei in inn an khangh i inn tam ngai a kaang, tiah theih a si.
“Nizan May 27, zanlei suimilam 4:00 hrawng in SAC ralkap nih inn khangh hram an thawk, vanlawng in khuapi chung ah bomb an thlak an thlak ruang ah inn a kaang mi zong a tam, kaphnih kar kahdohnak a fak ngai, khuapi laak timh kahdohnak a si caah khuapi laak khawh hlan chung cu kahdohnak a fak ko lai,” tiah thawng laaknak hrampi nih an chim.
Chin hriamtlai phu unau he naihniam in a um mi thawng laaknak hrampi nih cun, “Atu lio cu kahdohnak a fah cingling a si i kahdohnak kalpi cuahmah a si caah a dik mi thawngpang lawng thanh ding ti mi Policy a um, cu ruang ah cun dikthliar in thawngpang thanh awk a ṭha lo, kahdohnak a daih tikah Chin hriamtlai phu unau nih an ngeih mi Information Center in tlamtling tein thawng an thanh te ko lai,” tiah a chim.
Tedim khuapi chung kahdohnak ah cun Chin hriamtlai phu unau nih SAC ralkap 9 an tlaih hna i SAC ralkap thi le hliamtuar zong an tam, SAC ralkap nih an hman mi hriamnam zong tam ngai an laak. Chin hriamtlai phu unau in thi le hliam an um ve, tiah theih a si.
Gangaw LIB 50 Nih Hriamngan A Kah Ruang Ah Mipi 3 An Thi, 4 An I Hliam>>>>>>>>>
Magway ramṭhen, Gangaw hrambunh LIB 50 nih hriamngan an kah caah mipi 3 an thi i hngakchia 2 telh in 4 an i hliam tiah Gangaw peng mipi uknak phu nih an thanh.
May 26 zinglei sml 10:00am hrawng ah LIB 50 in an kah mi hriamngan 2 cu Aungmin khuate um mipi inn cung ah a tla i a puah caah mipi an thih le hliam an tuar hi a si tiah an langhter.
Hliam a tuar mi chung ah thla 8 hngakchia 1, kum 4 hngakchia 1 le kum 68 upa pakhat an i tel tiah Yaw Alindan zong nih an langhter.
Hliam a tuar mi hna hi an nunnak cu thinphan awk a um lo tiah theih a si.
Gangaw peng, May 16 zong ah Myaukkhinyan khua in SAC ralkap le pyusawhti pawl nih Yethar le Shwebo khua hna ah lut in mipi 2 an thah hna leng ah mipi inn 300 hrawng zong an khangh tiah Gangaw peng mipi uknak phu nih cun an thanh.
Gangaw pengkomh chung a um mi Saw peng, Agyipanpalwin khua le Ṭawma khua hna cu May 19 le May 14 ah SAC nih van lei in kahdohnak a tuah i mipi 25 nak tlawm lo an thi, 40 hrawng an i hliam tiah theih a si.
Leave a Reply