Sagaing ramṭhen, Salingyi peng, Salingyi myoma palek sakhaan in palek pakhat cu Yinmarbin pengkomh No. 16 Battalion, Company 4, Salingyi Revolution Eagle sin ah hriam he CDM a tuah tiah theih a si.
May 26 chun sml 2:30pm ah Salingyi palek sakhaan in palek Mg Htu Kaung cu G3 zuunkhat, 7.6 kuan 15, kuanbawm, namte 1 he CDM a tuah tiah Salingyi Revolution Eagle phu nih an thanh.
Mipi sin aa rak fonh mi Htu Kaung cu Yinmarbin pengkomh No. 16 Battalion nih tangka sing 100 laksawng an pek i himnak hmun ah an kuat tiah theih a si.
Waimaw Um SAC Ralkap Sakhaan 1 KIA Nih An Lak>>>>>>>
Waimaw um SAC ralkap sakhaan hme pakhat cu May 28 zinglei sml 7:30am hrawng ah KIA phufonh nih an lak tiah theih a si.
Naung-si khua um SAC ralkap sakhaan in SAC ralkap pawl an zaam caah an lak khawh hi a si tiah The 74 Media nih a langhter.
Cu sakhaan hi Myitkyina-Banmaw lam um Kha-shi khua pawng ah a um i SAC kuttang pyithusit pawl sakhaan a si.
Kahdohnak um lo in sakhaan an lak khawh hi a si i hmunhma zohfelnak an tuah lio tiah theih a si.
Mizoram Min Cimh Ruang Ah A Thi Mi 31 An Phan>>>>>>>>
Mizoram ah Cyclone thlichia Remal ruang ah May 27 le May 28 chun tiang ruah pehzuh in a sur i Aizawl khua pawngkam ah zinglei sml 6:00am tiang vawlei a cimh caah mipi a thi mi 31 tiang an phan cang tiah Mizoram chung thawngzamh pawl nih an langhter.
Mizoram cozah nih kokek thil ṭihnung a tong mi mipi pawl bawmhnak caah Rupees 15 Billion a suaisamh i vawlei cimh ruang ah a thi mi pawl cu minung pakhat ah Rupees sing 4 cio a pek hna lai tiah theih a si.
Chin ramkulh he ramri aa tlaihnak India, Mizoram mipi inn pawl hi chengpalang le tlang hna ah benh in an sak mi pawl a si i fur caan ah atu bantuk in vawlei cimhnak hi kum fatin an tong i 2024 chung ah a cang mi vawlei cimhnak ruang ah mipi tampi an thih hi a voikhatnak a si.
Leave a Reply