Falam Khuapi Le A Kiangkap Khua Paoh Ralzaam Lo Ding In Lungtlinnak An Ngei>>>>>>

Chinram, Falam khuapi, Nunphung Innpi ah Falam khuapi um khuanu khuapa le a kiangkap khua 9 in minung 70 leng cu nihin May 31, zing suimilam 10:00 in zanlei suimilam 1:00 tiang tonbiaruahnak ngei in Falam khuapi boruak kong ceihmainak an ngei i Falam khuapi le a kiangkap khua paoh ralzaam lo ding in le mahle umnak inn cio ah um cio ding in lungtlinnak an ngeih kong, Falam Pawlpi, Falam Committee nih an thanh.

Nihin i Falam khuapi khuanu khuapa nih Nunphung Innpi ah an ceihkhan mi ah cun atu lio cu a dik lo mi thawngpang aa chawkvai mi a tam hlei ah pumpak ruahnak le zumhnak in ṭial mi ca a tam ngai caah nihin i bia kan khiah mi tete a thei rih lo mi Falam khuachung um mi le a kiangkap khua mi sin ah chim le thanh dih ding in lungtlinnak an ngeih kong an langhter i, Falam khuapi chung ah Falam Pawlpi tawlrelnak in Volunteer minung 20 thim an si kong an langhter chih.
Cu pin ah Falam khuapi chung boruak ruang ah thingphang thlalau ngaiin an um mi kong ah ṭuanvo ngeitu pawl he tonbiaruahnak ngeih ṭhan an i timh kong zong Falam Pawlpi nih cun an cathanh chuah mi ah an langhter.

Tonzaang Le Cikha Khuapi Kahdohnak In A Tlung Mi CDF-Thantlang Ralkap Hna Ca Ah Thlacamnak An Tuah>>>>>>

Chinram, Tonzaang le Cikha khuapi kahdohnak in a tlung mi Chinland Defense Force – Thantlang ralkap hna cu thlacamnak an tuahpiak hna i Pathian sin lunglawmh thlacamnak in caan an hman kong, CDF-Thantlang nih nihin May 30 ah an thanh.
A luancia April 27 ni in a rak chuak i Tonzaang le Cikha khuapi kahdohnak ah i tel in a kir ṭhan mi CDF-Thantlang ralkap hna le inn ah a rak um mi ralkap hna lunglawm tein an i ton khawh ṭhan caah Pathian sin ah lawmh biachim in thlacamnak an ngeih kong le ram le miphun ca ah nunnak a pe mi CDF-Thantlang pasaṭha hna upat peknak in caan an hman kong cu CDF-Thantlang nih an langhter.
Tonzaang khuapi kahdohnak ah cun CDF-Thantlang telh in CNA hruai mi Chin hriamtlai ṭangṭi phu hna an i tel i Tonzaang khuapi lawng si lo in Cikha khuapi zong an rak laak chih, cu kahdohnak ah cun SAC ralkap 20 leng an thi i minung 40 leng an tlaih hna. Ṭangṭi phu nih SAC ralkap hriamnam tam ngai an laak pin ah tangka Kyats sing 5,000 leng an laak. Chin hriamtlai ṭangṭi phu in hliamtuar an um i CDF-Thantlang ralkap pathum telh in ṭangṭi phu in ralkap cheukhat nih ram le miphun ca ah an nunnak an pek ve.