Chinram, Mindat peng, Circle 1 hmunram chung khua pakhat ah SAC ralkap nih raltuknak vanlawng in nizan June 4 zanṭim suimilam 12:00 hrawng ah bomb an thlak i tualchung mi pakhat nunnak a liam pinah, minung pathum hliam an tuar i inn thum a rawk dih, tiah Chin Defence Force – Mindat nih nihin June 5 ah an thanh.
Mindat peng chung cacawnnak sianginn, biaknak he aa pehtlai mi inn, siizung siikhan le umnak inn hna ah SAC ralkap nih timh ciammam tein bomb an thlak lengmang ruang ah lungkhur le i dupnak ding khur pawl fek tein sak cio ding in Mindat peng zatlang ukhruaitu phu nih nizan June 4 ah an thanh.
A luancia May 25 ni ah Mindat peng, Vawmthu khua siizung ah SAC ralkap nih vanlawng in pound 500 tluk a rit mi bomb 4 an rak thlak ruang ah siizung cu a ningpi in a rawk dih i mizaw le mizaw zohtu 5 an thih pinah minung 30 hrawng hliam an rak tuar.
Chinram chaklei Tonzaang khuapi, Cikha khuapi cu CNA hruai mo Chin hriamtlai ṭangṭi phu nih an rak laak cang i Tedim khuapi laak ding in Chin hriamtlai phu unau nih kahdohnak an kalpi ve lio a si caah Mindat khuapi zong ah kahdohnak a fak sual lai tiin khuapi um tualchung mi tam deuh cu khuapi chuahtak in an zaam hna, tiah theih a si.
Mizoram Leimin Tuar Mi Hna Ca Ah CBCUSA Nih Rs Rs. 840,000 An Pek>>>>>>
Chin Baptist Church, USA nih naite i Aizawl khuapi le a kiangkap leimin tuar mi hna bawmhnak ca ah tiin Chief Minister Relief Fund ah Rs. 840,000(US Dollar 10,000) an pek. CBCUSA nih CM Relief Fund ah bawmhnak an pek kong hi Mizoram Chief Minister Pu Lalduhoma nih amah pumpak social media ah a ṭial.
A luancia May 28 ah a cang mi leimin ruang ah hin Aizawl khuapi chung le a kiangkap ah minung 33 nunnak a liam i nunnak a liam mi lakah ruak hmuh lo mi zong an um. Nizan tiang ruak kawl tlangrian kalpi a si hnu ah Mizo phungning in ruak kawlnak an donghter.
Myanmar ram buai ruangah Mizoram lei i ralzaam an karh hnu in CBCUSA nih hin bawmhchanhnak voi tampi an pek cang pin ah hruaitu upa hna zong Mizoram ah rak tlawng in ralzaam in aa dor mi an rak veh cang hna.
CBCUSA cu khrihfabu 120 leng an i funtomnak a si i members 33,000 hrawng a ngei mi a si pin ah Indiana State ah College tiang a ngei mi Khrihfabu an si.
Leave a Reply