Magway ramṭhen, Pauk peng, Thit-cho-kone khua ah a um mi SAC ralkap le pyusawhti sakhaan cu an kah hna i pyusawhti 5 an thi, meithal zuun 9 le kuanzen pawl an lak khawh tiah PDF phu pawl nih an thanh.
June 1 zaan sml 8:00pm hrawng thawk in Thit-cho-kone khua ah pyusawhti pawl le SAC ralkap nih hmunhma an khuarnak sakhaan cu Drone in bom an thlak, hriamngan le hriamhme he an kah hna tiah Myaing PDF nih an thanh.
Kahdohnak hi sml 5 hrawng a rau i kahdohnak ruang ah pyusawhti 5 an thi tiah an thanh.
Cun Carbine meithal zuun 1, Carbine kuanbawm 3, Grenade 1, Carbine kuan 102, 12 volt meithal zuun 3, kut tuah meithal 5 hna an lak khawh tiah Pakokku PDF nih an thanh ve.
Kahdohnak chung ah Pakokku PDF le Pauk PDF, Myaing PDF le adang dothlennak phu tampi an i bawm hna tiah theih a si.
SAC Ralkap An Thian Tiang Kahdohnak Ah I Fonh Ding In Chin Dothlennak Phu Pawl Bia An I Ruah>>>>>>>>>>>
Chin ramkulh chung ah SAC ralkap a thian khawh nakhnga a biapi mi sakhaan pawl kahdohnak ah i bawm ding in Chin dothlennak phu pawl biaruahnak an ngei tiah theih a si.
Chinland cozah nih a tuah mi a voi 3nak Defense kong meeting cu May 31 ah Chinlung khua ah an tuah i CNA telh in Chin hriamtlai phu 14 biaruahnak an ngei tiah theih a si.
Chin ramkulh chung ah a um mi SAC ralkap sakhaan pawl a rannak in an lak khawh nakhnga an i ruahchan mi a si i hmunkhat te ah lubgrual tein doh ding kong an i ruah tiah Chinland Council General Secretary Salai Paul nih Mizzima ah a chim.
Khualak kahdohnak a si lo nain Thantlang, Hakha peng pawl ah kahdohnak hme tete a um tiah a chim fawn. Chin ramkulh chung ah a um mi SAC ralkap pawl cu khua kilvennak nak in an sakhaan an sungh lo nakhnga caah ṭha tein an umnak an kham tiah a chim fawn.
Atulio Chin Brotherhood nih an kah cuahmah mi Tedim khua cu a rannak in an lak khawh nakhnga tha kan pek hna i bawmh ding in an kan sawm ahcun kan cohlan lai tiah Salai Paul nih a chim fawn.
Tedim khuachung um SAC ralkap sakhaan pawl cu PDF-Zoland telh in Chin hriamtlai phu pawl nih May 26 zaan in an kah. May 27 zinglei ah Nah-tah-lah le Micro pehtlaihnak zung hna an lak khawh.
Tedim khua kahdohnak hi zarhkhat hrawng a rau cang i SAC ralkap nih mipi 50 leng an khangh cang tiah theih a si.
Chin Ralzaam 150 Hrawng Magway Ramṭhen Chung An Phan>>>>>>
Chin ramkulh chung kahdohnak ruang ah Mindat le Matupi peng in ralzaam 150 hrawng cu Magway ramṭhen chung ah an phan hna tiah theih a si.
Mindat peng in minung 100 hrawng le Matupi peng in minung 50 hrawng cu Chin ramkulh kahdohnak ruang ah May thla zarhthumnak thawk in an zaam hi a si.
Saw peng, Yaung Ni Oo ralzaam camp ah ahlan ralzaam 200 hrawng an um nain atu cu 350 hrawng an phanh cang caah umṭhut le eidin kong ah harnak an tong tiah bawmhnak petu minung chim mi cherhchan in RFA nih a langhter.
Atu zong Chin ramkulh in adang minung 500 hrawng Saw peng ralzaam camp ah i dor ding in an rak pehtlaih tiah a chim fawn.
Saw peng ah Yaung Ni Oo ralzaam camp telh in ralzaam camp 4 a um tiah theih a si. Fur caan a phanh cang lai caah ruah khamnak le inn pawl a rannak in dih a hau tiah a chim.
UNOCHA cazin ning ahcun Myanmar ramchung ah innlo a zaamtak mi sing 3 leng an um cang tiah theih a si.
Leave a Reply