Tedim Khua Ah SAC Ralhrang An Kiir Tthan Mipi Sinah Ralhrang Nih Sawmh Nak An Tuah>>>>>>

Mansuang hlei SAC Ralhrang nih bomb in an hrawh hnuah SAC Ralhrang pawl cu Tedim leiah an panh tthanh tiah thawngpang kan theih.
Cun SAC Ralhrang nih Tedim mipi cu hna ngam tein um cang ding zongin tthazang an pek hna tiin theih a si.
Tedim mipi ralzam dihlak zong an khua ah ra kiir cioding in SAC Ralhrang nih an sawmh hna tiin Zomi Reader nih mipi sinah a phuan.

Serchhip Khua Ah Mizoram Palik Nih Myanmar Lei Mi 2 Sin In Meithal Kuan Tam Ngai An Tlaih>>>>>>

Mizoram, Serchhip khuapi ah June 7, 2024 ah khan AK-47 meithal kuan 1980 le Myanmar motorcycle cu a ngeitu ah puh mi Thantlang khua veve Lalnunnema(kum 31) le Lalchhanhima(kum 44) cu Mizoram palik nih an tlaih hna, tiah Mizo lei media nih an langhter.
Meithal kuan an tlaih mi hi pakhat Rs 550 in tuak ah a dihlak Rs 1,089,000 man a si. Tlaih a tong mi pahnih hi Arms Act, Motor Vehicles Act le Foreigners Act in sual kawlpiak an si.

Kalaymyo Khuachung Ah Ti Aa Liau Mi Mino 20 Leng SAC Ralkap Nih An Tlaih Hna>>>>>>>>

Sagaing ramṭhen, Kalaymyo khuachung ah ti aa liau mi kum 20 hrawng mino 20 leng cu SAC ralkap nih a ruang um lo in an tlaih hna i an kalpi hna, tiah theih a si.
Nizan June 9, chunhnu suimilam 2:00 hrawng ah Mingyi Hotel ti liauhnak ah ti a liau mi mino 20 leng cu SAC ralkap 30 hrawng nih a ruang um lo in an tlaih hna i Dah-Kah-Sah chung ah an hren hna, tiah theih a si.

“Zeiruang ah dah an tlaih hna ti mi fiang in theih a si lo, tlaih a tong mi an zate in Dah-Kah-Sah chung ah an hren hna i khoika dah an kuat te hna hnga hngalh a si lo, tlaih a tong mi mino 20 hrawng an si i nu zong an i tel,” tiah tualchung mi pakhat nih a chim.
SAC nih ram mino ralkap tlakternak ding phung an nunnter ṭhan hnu in Kalaymyo ah a voi khatnak bik a bu in mino tlaih an ton a si. Kalaymyo kiangkap kahdohnak ruang ah Kalay peng chaklei khuate in khuapi chung ah ralzaam in aa dor mi a thong leng an um, tiah tualchung mi nih an chim.

A luancia January thla chung zong ah Kalaymyo, Panglong sang chung Phoe Lamin changreu dawr ah SAC ralkap nih dawr ngeitu telh in dawr rianṭuan mi le thil caw mi minung 15 hrawng an rak tlaih hna.
Ramkhel thongtla zohkhenhtu phu AAPP nih June 7 ni tiang i an langhter mi cazin ning ah SAC ralkap nih hramhram in nawlngeihnak an laak hnu ah Myanmar ram hmun kip ah tlaih a tong mi 26,837 an phan i, cu chung ah cun minung 20,578 cu SAC ralkap nih an hren rih hna.