Hakha ah SAC ralkap nih VPN a hmang mi an check i nuva hna cu VPN an hman ruang ah an tlaih hna tiah theih a si. Cu nuva hna cu a tlawmbik tangka sing 30 nan liam lai tiah an ti hna.
Hakha khuachung ah SAC ralkap an i chawk ngai. Siizung lampial le hmundang zongin mi an bawh i an check hna tiah mithmutu pakhat nih The Chin Post ah a chim.
Myanmar ah cun internet hi VPN he lawngin hman khawh a si caah SAC ralkap nih VPN hi tuanpi khan phih an timh cang mi a si. China in thiamsang minung 13 an sawm hna i VPN phih ding cu an i zuam i May 30 khan zeimawzat an phih khawh nain an phih khawh lo mi VPN a um len. Cucaah atu bantukin VPN a hmang mi an check i an tlaih hna hi a si
Chinram Chung Ah ULA/AA Nih Kahdohnak Kalpi Mi Kong Ah Chinland Council Nih Duhlonak Langhter>>>>>>>>>>>>>>>
Chinram chung hmun cheukhat ah duh paoh in a cawlcang i pehzulh in kahdohnak kalpi aa tim mi United League of Arakan/Arakan Army cu Chinram chung ah kahdohnak tuah lo ding in le Chinram chung ah zatlang ukhruainak an kalpi mi le hramhram in Chinmi an tlaih hna i an ralkap ah luhter in training an pek mi hna kong ah Chinland Council nih nizan June 10 ah an duhlonak cathanh an chuah.
“United League of Arakan/Arakan Army nih Chinram chung ah sualnak ngei lo Chinmi an tlaih hna i AA ralkap ca ah training an pek hna, anmah duh paoh in Chinram chung ah zatlang ukhruainak an kalpi i zalong tein fimcawnnak le biaknak kong ah nuhrin covo an buar mi cu lung a ṭha hrimhrim lo. Hi bantuk tuahsernak nih hin thlangcung hriamtlai phu khat le phu khat kar ah i hmuhthiam lonak a chuahter i, i dawtnak, khat le khat i zumhnak a tlauter pin ah kan dohthlennak a fumhter caah a ṭha hrimhrim lo,” tiah Chinland Council nih Chinram chung i AA cawlcangh ning cu duhlonak an langhter.
Chinram nawlngeihnak cu Chinram chung um mi mizapi lawng nih ngeih khawh mi a si caah ULA/AA nih Chinram chung ah kahdohnak kalpi a timh mi hrial ding le Chinram chung ah Chinmi hnatlaknak tel lo in zatlang ukhruainak kalpi timh mi ngol ding, tiah Chinland Council nih cun AA sin ah theihternak an tuah. Chinram chung ah nuhrin covo buarnak he aa pehtlai mi tuahsernak vialte cu tlangcung hriamtlai phu khat le phu khat kar ah buainak a chuahpitu a si i miphun buainak a linhsattertu le kahdohnak tiang a chuahter khotu a si caah Chinland Council nih theihternak a tuah mi zulhpiak in Chinram chung i nan tuahsernak vialte kan ngolpiak cang u, tiah Chinland Council nih cun an langhter.
Hi kong ah hin Chin hriamtlai phu unau (Chin Brotherhood) nih cun Rakhine ralkap AA tuahsernak zohchunh tlak a sinak le anmah he ṭangṭi in Chinram chung ah pehzulh in kahdohnak kalpi an i timhnak kong, Chin le Rakhine i dawtnak cu atu nakin fehter deuh in AA le Rakhine mizapi he hmunkhat ah dirṭi an i timh kong cu a luancia June 8 ni ah an rak langhter ve.
CDF-Thantlang Nih A Voi Thumnak Refresher & Combat Training Tlamtling Tein An Lim>>>>>>>>>>
Chinram, Thantlang peng ah hrambunh in hriam a tlai mi Chinland Defense Force – Thantlang nih a voi thumnak Refresher & Combat Training cu tlamtling tein an lim i nihin June 10 ah training lim lunglawmh caan(Closing Ceremony) hmannak an ngeih kong, CDF-Thantlang nih an thanh.
Chinland Defense Force – Thantlang nih an tuah mi a voi thumnak Refresher & Combat Training ah cun ral lei thiamnak le raltuk cawnnak lawng si lo in Chin miphun dohthlennak kongkau, ramkhel lei hngalhkauhnak le minung hawi cung zawnruahnak phungphai (International Humanitarian Law) kong zong cawn chih a si kong, CDF-Thantlang nih an langhter.
Chinland Defense Force – Thantlang nih a voi hnihnak Refresher & Combat Training zong tlamtling tein an rak lim i a luancia April 9 ni ah khan training lim lunglawmh caan hmannak(Closing Ceremony) an rak tuah. Cu training ah cun atu bantukin Chin miphun dohthlennak kongkau, ramkhel lei hngalhkauhnak le minung hawi cung zawnruahnak phungphai (International Humanitarian Law) kong an rak cawn chih.
Leave a Reply