Chin ramkulh thlanglei, Matupi peng, Ansuai khua cu SAC nih vanlei in kahdohnak a tuah caah mipi inn pakhat a rawk tiah theih a si.
Matupi khua, LIB 304 pawng um Ansuai khua cu SAC nih van lei in kahdohnak a tuah caah mipi inn 1 a rawk tiah theih a si.
June 10 zinglei sml 4:30am hrawng ah Ansuai khua gate cu SAC ralkap nih Point 5 in an kah caah mipi pawl himnak hmun ah an zaam hna i zinglei sml 5:00am hrawng ah 250lb a rit mi bom in a thlak chap caah mipi inn pakhat a rawk tiah theih a si.
SAC nih May 26 thawk in van lei kahdohnak a tuah cang tiah theih a si.
A luancia May 26 zong ah Matupi peng Battalion 2 umnak, pengkomh zung umnak cu SAC ralkap nih an kah i June 4 ah Waitu khua pawng ah kahdohnak a tuah tiah theih a si.
June 5 ah CDF-Matupi Battalion 1 umnak, Chanpian khua sakhaan cu bom a thlak nain hliam tuar mi le adang dang rawk mi um lo tiah theih a si i June 6 zong Battalion 1 umnak sakhaan hlun zong a kah chap tiah theih a si.
SAC nih Matupi peng chung ah voi 32 bom a thlak cang tiah theih a si.
Majesty Hotel Ah Tlaih Mi Mino Cheukhat Biakamnak He An Thlah Hna>>>>>>
Sagaing ramṭhen, Kalaymyo, Majesty hotel ti lionak ah tlaih a tong mi mino chung in kum tling rih lo mi nu le mino cheukhat cu biakamnak he nihin (June 10) ah an thlah hna tiah theih a si.
Kalaymyo, Thazin zong, Bogyoke lam pawng ah a um mi Majesty hotel ti lionak ah ti aa lio lio mi mino 20 hrawng cu June 9 chun sml 2:00pm hrawng ah SAC ralkap nih an rak tlaih hna hi a si.
Cu mino chung ah kum 10 cung hngakchia pawl an i tel ve i Kalaymyo hrambunh ROC chung ah an kalpi hna hnu nihin zinglei ah kum tling rih lo mi nu le mino cheukhat cu biakamnak he an thlah hna tiah theih a si.
Kalay khuami pakhat nih “Tuzing ah kum tling lo cheukhat an thlah hna, a kumtling mi pawl kha cu ralkap tla ding auh tikah kan kal hrimhrim lai timi biakamnak minthut he an luat, cheukhat cu an luat rih lo” tiah Khonumthung Burmese ah a chim.
Asinain tlaih a tong mi minung 20 chung ah minung zeizah dah an luat ti cu a fiang in theih a si rih lo tiah a chim fawn.
June 10 zinglei zong ah SAC chungtel pawl nih mipi cheukhat an tlaih hna i Truck mawṭaw in ROC chung ah an kalpi hna tiah theih a si.
Pyusawhti Phu Nih Biakinn A Kal Lio Mi Chin Nu 2 Mawṭaw In An Pah Hna>>>>>>
Sagaing ramṭhen, Tamu khua ah biakinn a kal lio mi nu 2 cu June 9 ah pyusawhti phu nih mawṭaw in an pah hna caah an i hliam tiah theih a si.
Nu 2 hi biakinn kal ding in cycle in an rak chuah a si i pyusawhti phu pawl nih an hnulei in an pah hna hi a si tiah a hmutu pakhat nih Zalen ah a chim.
Atu bantuk in mawṭaw in pah hna leng ah mawṭaw cung in an ṭum i ahohmanh kha tonghnak nawl an pe hna lo, an pale an rak phak hnu lawng ah sizung ah an kalpi hna, an hlianhma hi thinphan awk cu a um tuk lo tiah aa naihniam mi nih Zalen ah an chim.
Leave a Reply