Nizan June 12 zinglei ah khan Tedim khuapi ah SAC ralkap nih Chin Brotherhood ralkap pawl cu an kah hna i, Chin Brotherhood lei in ralkap 5 nunnak a liam, tiah theih a si.
A luancia May 26, zaan sml 11 thawk in Chin Brotherhood nih Tedim khuapi um SAC ralkap pawl cu kah hram an rak thawk i, kahdohnak thawng a dai pah nain nizan zinglei 7:30 hrawng in kahdohnak a faak ṭhan, tiah theih a si.
Tedim khuapi ah kahdohnak a chuah hnu in tualchung mi 13,000 hrawng cu hmunkip ah an zaam hna i, SAC ralkap nih inn tampi an khangh cang. Tualchung mi cheukhat chim ning ah inn hi a tlawm bik 50 hrawng an khangh cang. Kahdohnak ruangah tualchung mi 4 nunnak a liam i 10 hrawng hliam an pu, tiah theih a si.
Nizan kahdohnak kong he pehtlai in tualchung mi cheukhat nih cun, “Dalan thawng peknak ruang ah Chin Brotherhood lei umnak hmun cu SAC ralkap nih an kah i a thi mi zong an tamnak hi a si,” tiah an chim.
Chin Brotherhood lei in nunnak a liam mi hna cu Benjamin Thang Sawm Liam(PDF Zoland), Zam Pian Tuang(PDF-Zoland), Khai Sian Suan Sang(PDF-Zoland), Thang Sian San Muang(PDF-Zoland) le Thian Thawng(CNDF) ralkap hna an si, tiah tualchung media Tedim Times nih a langhter.
Kahdohnak kong he pehtlai in SAC lei media nih cun PDF 7 an thih pinah hriamnam zong kan laak, tiah an langhter ve.
MTC/MDF Le IMC/CDF-Mara Nih Kaphnih Kar Remdaih Hnatlaknak An Rak Ngeih Mi An Hrawh Ṭhan>>>>>>>>>>
Mara biaknak lei hruaitu tawlrelpinak in Mara hriamtlai phu MTC/MDF le IMC/CDF-Mara cu kaphnih kar remdaih hnatlaknak an rak ngei nain caan a rauh hlan ah MTC/MDF lei nih hnatlaknak an ngeih mi an zul duh lo tiin i fumtomnak(Reunification) rian kalpi timh mi an ngol kong, IMC/CDF-Mara nih nihin June 12 ah an thanh.
Mara hriamtlai phu hnih IMC/CDF-Mara le MTC/MDF cu Mara Evangelical Church tawlrelpinak in a luancia May 22-23 ni ah kaphnih hruaitu minung 8 veve in tonbiaruahnak an ngei i remdaihnak le i fumtom ding kong ceihmainak ngei in kaphnih hnatlaknak phun 7, zulhphung le pehzulh ding mi rian kong ah hnatlaknak phun 8 tiin minsen an rak thut hnu, thla khat hmanh a tlin hlan ah kaphnih kar hnatlaknak an ngeih mi ngol a si kong, IMC/CDF-Mara nih nihin an langhter.
Kaphnih lungtlin hnatlaknak rak ngeih bantuk in minsen thut ni thawk in ni 14 chung ah IMC/CDF-Mara nih a hren mi MDF ralkap 4 cu a caan he aa tlak ning in an luat khawh nakhnga a luancia June 1 ni ah Lailenpi khuapi ah kalpi in luat ding ah timhlamhpiak an rak si nain MTC/MDF nih an hren mi CDF-Mara ralkap 3 thlahpiak ve ding in atu le atu IMC/CDF-Mara nih nawlnak an tuah mi an duh lo ruang ah remdaihnak le i fumtom ding in hnatlaknak ngeih mi phung cu MTC/MDF nih langsar ngaiin an buar a si.
Remdaihnak tlau ding in timh ciammam tein MTC/MDF thil tuah mi ruang ah hin i fumtomnak(Reunification) kalpi timh mi rian cu ngol a si cang, tiah IMC/CDF-Mara nih an thanh mi ah a langhter.
Hi kong he pehtlai in Mara Territorial Council/Maraland Defence Force lei nih cun atu tiang ah zeibantuk cathanh hmanh an chuah mi a um rih lo.
Leave a Reply