Chin ramkulh, Tedim peng chung ah SAC ralkap pawl an luh chap caah khuami 1,000 leng an zaam tiah thawng theih a si.
SAC nih June 15 thawk in thazang 100 hrawng SAC ralkap pawl Tedim peng chung ah a thlah chap hna caah khuami pawl an zaam hi a si tiah theih a si.
SAC nih Tedim peng chung um Laythar tlang lei kal ding in aa zuam tiah theih a si.
Cun Kalaymyo lei in bawmhnak a kuat tiah theih a si fawn.
Tedim peng chung hriamtlai pakhat a si mi CDF-CDM Siyin nih June 13 thawk in Kalay-Tedim lam cu zaan caan ah umkalnak nawl a phih i a bu in um lo ding tiah nawl a chuah fawn
Matupi Kahdohnak Ah CDF-Matupi Hriamtlai Pakhat A Nunnak A Liam>>>>>>>
Chin ramkulh, Matupi khua kahdohnak ah CDF-Matupi Brigade (1) hriamtlai a si mi Salai Pa Tu cu ralram kahdohnak hmunhma pakhat ah a nunnak a liam tiah Chinland News sin in thawng theih a si.
Mindat Ah Chungtlik Zawtnak A Karh, A Thi Mi Zong An Um>>>>>>
Chin ramkulh, Mindat khua ah aa chawnh dan a rang tuk mi chungtlik zawtnak a karh, minung a thi mi tiang an um caah a rannak in sii lei bawmhnak an herh tiah Mindat peng ralzaam Committee bawmhnak phu ṭuanvo ngeitu Law Rence nih Khit Thit ah a chim.
Atulio hi Mindat peng zapi ngawt ah chungtlik zawtnak a karh i minung a thih phah mi zong an um, cheukhat khua cu luh/chuah nak nawl an phih, Mindat peng mipi uknak phu, ngandamnak lei nih siikhaan hna ah an thlop hna leng ah an umnak hmun tiang an va thlop hna caah sii lei an chanbau hringhran cang tiah theih a si.
“Mindat peng chung khuate tampi ah chungtlik zawtnak a karh, minung zeizah dah a zawt hna, minung zeizah dah a chawnh hna ti cu a fiang in theih a si lo, kanmah chungkhar zong chungtlik nih a kan phak, Aukchai khua ah minung 2 an thi, sii lei an chanbau tuk, hrik thah sii hna an herh tuk” tiah Law Rence nih cun a chim.
Atulio a cang cuahmah mi chungtlik zawtnak thlop khawh nakding caah sii cawk ding a har i a si khawh chung in kan bawm cio uh tiah Law Rence nih Khit Thiy ah a chim.
Matupi Kahdohnak Ah SAC Captain Telh In Pali An Thi>>>>>>>
Chin ramkulh, Matupi kahdohnak ah SAC Captain Aung Thu Shing telh in SAC lei 4 an thi tiah theih a si.
Matupi khua, June 16 ah Chin dothlennak phu pawl le SAC ralkap karlak ah kahdohnak a fak, cu kahdohnak chung ah SAC lei Captain Aung Shing Thu a thi i adang SAC ralkap 3 zong an thi ve, Captain Aung Thu Shing le adang ralkap 3 cu Chin dothlennak phu pawl nih an sakhaan hme an kah hna lio ah an thih hi a si tiah theih a si.
Chin ramkulh, Matupi lak kahdohnak cu Chin Brotherhood phu nih an tuah hi a si i Matupi khua Myoma palek sakhaan le GAD zung hna cu an lak khawh cang tiah June 14 ah thawng an thanh.
Matupi khua lak kahdohnak chung ah Chin Brotherhood phu telh in AA zong nih a bawmh ve hna, SAC lei nih van lei in kahdohnak a bawmh hna caah Matupi khua a rawk cuahmah tiah an thanh fawn.
June 9 thawk in Chin Brotherhood phu nih Matupi khua chung ah an luh hi a si i June 13 thawk in Matupi khua lak kahdohnak an tuah hi a si.
Matupi khua lu lei ah a um mi SAC LIB 304 hi CDF-Matupi Battalion 1, Chin Brotherhood, AA le Yaw PDF hna nih an kah mi a si i Matupi khua taw lei, Hakha kalnak lei ah a um SAC LIB 140 hi CDF-Matupi Battalion 2, CNA le Chinland cozah tang hriamtlai phu pawl nih an kah mi a si tiah thawng theih a si.
AA Nih Maungdaw Tamtling Tein Ka Lak Tiang Ka Doh Lai Tiah A Chim>>>>>>>>
Rakhine ram, Maungdaw khua ah a um mi SAC ralkap sakhaan pawl cu biatak tein ka doh cang lai caah mipi pawl a rannak in zaam u tiah AA nih thawng a thanh.
SAC nih Maungdaw khua cu a sakhaan bantuk in a hman, khua lak kahdohnak tuah ding in kan i timhtuahnak hi a caan a sau cang caah SAC ralkap sakhaan vialte kan kah cang lai. Mipi hna nih June 16 zaan sml 9:00pm thawk in a rannak in zaam ding tiah a thanh.
Cun lamcung, innchung pawl ah SAC ralkap nih hmunhma lak ding in an i timhtuahnak hmunhma pawl, inn sang pawl cung in Sniper nih hmunhma an laknak pawl, SAC ralkap pawl an umnak hmunhma pawl ah naihniam tuk in um lo ding tiah AA nih a thanh
Maungdaw khuami vialte khua chuahtak ding in AA nih a thanh ko nain zeitindah an in bawmh hna lai ti cu a thanh lo.
Maungdaw khua um SAC ralkap sakhaan pawl cu AA nih tlamtling tein a lak hnu ah khua pawngkam um mi sakhaan vialte zong a kulh dih cang tiah cathanh ah an langhter.
Leave a Reply