CDF/CNA hruai mi hriamtlai pawl cu June 24 zaanlei ah Matupi in kan dawi khawh cang hna, tiah AA hruai mi Chin Brotherhood (CB) nih nihin June 25 ah theihternak a tuah.
“Matupi khua laak kahdohnak ah Chin Brotherhood Operation hnahnawhnak a kan petu CNF/CNA hruai mi hriamtlai bu pawl cu June 24 zaanlei ah kan dawi khawh cang hna,” tiah CB nih a langhter.
“Matupi khua i SAC ralkap sakhaan Kha La Ya (140) le Byohakung ah a um mi Sentry conghnak sakhaan cheukhat kan laak khawh cang i, Matupi peng chung ah SAC an thian nakhnga kan i zuam lai,” tiah an langhter chap.
Cu lawng si lo in CNF/CNA hruai mi hriamtlai bu hna hmun an khuarnak Ngalai le Phanaing karlak ah bomb rap tampi an tarh caah thianhhlimhnak kan tuah cuahmah lio a si, ti zong in an langhter.
Matupi khua i Kha La Ya (304) SAC ralkap sakhaan zong June 17 ah AA hruai mi CB ralkap hna nih an rak laak khawh cang, tiah theih a si.
SAC ralkap nih Hakhathar ah inn 10 an khangh>>>>>>>>
June 25 zinglei sml. 3:00 hrawng ah SAC ralkap nih Hakha khua, Hakhathar sang ah khuami inn 10 cu petrol an toih i an khangh hna tiah CDF-Hakha nih a thanh.
Hakhathar lam ruk tonnak ah a um mi SAC ralkap hna cu CNA le CDF phu komh nih June 24 zaan sml. 8:00 ah an kah hna. Kahdohnak cu suimilaam pakhat hrawng a rau i, deilei ah SAC ralkap nih inn an khangh hna tiah kan theih.
“SAC ralkap nih Petrol an toih i an khangh hna, petrol toih mi puanchia an khangh mi zong in inn an cheh. Inn sarih cu khuami nih mei an thah khawh. Inn thum a ciam,” tiah khuami pakhat nih a chim.
Cu kahdohnak ah cun SAC lei kah mi hriamngan ruang ah khuami pakhat hma a pu ti zong theih a si.
“Cu bantuk in rammi cung ah sual a tuahtu ralhraang council cu faakpi in kan doh i, rammi hna sungh zatlaknak cung ah tuanvo an laak ṭhan lai,” ti zong CDF-Hakha thawngthanhnak ca ah an langhter.
Leave a Reply