Malaysia ram, Kalan khua um rianṭuannak sehzung le minung umnak inn pawl cu June 23 ah Malaysia ram nawlngeitu pawl nih an luh hnawh hna i Myanmar rammi 150 hrawng telh in minung 1,700 leng an tlaih hna tiah Malaysia phan, Myanmar rammi hna nih RFA ah an chim.
An tlaih mi hna chung ah Card, Visa le Passport ṭha tein a ngei mi pawl cu an thlah ṭhan hna cu, cubantuk cauk ṭha tein a ngei lo mi cu an hren rih hna tiah tlaihkhihnak chung in a luat mi Myanmar rammi pakhat nih RFA ah a chim.
“Nizaan ah tlaih a tong mi hi 1,700 leng kan si. Cu chung ah Myanmar rammi 150 hrawng kan i tel. Cauk ṭha tein a ngei mi tampi an luat ṭhan. Cauk a ngei lo mi 30 hrawng cu an tang ko. Kan hawile pahnih zong an tang ve, kei cu cauk ka ngeih caah tuzing ah an ka thlah ṭhan” tiah RFA ah a chim.
Tlaih a tong mi 1,700 leng chung ah Bangladesh miphun a tam bik an si i, Myanmar, Pakistan, Nepal le Thai miphun hna zong an i tel tiah a chim.
Malaysia ramchung mi luhchuahnak lei zung nih cun, mipi pawl nih an kan phuan caah Operasi kan luhnak hi a si tiah an chim ve.
Malaysia UNHCR zung nih 2024 April thla dongh tiang a ngeih mi cazin ning ah Malaysia ram in ramkhel ruang ah dornak nawl a hal mi 190,000 deng an um mi chung ah 160,000 leng hi Myanmar rammi an si hna tiah theih a si.
Hakha, Khuathar Sang Ah Pumhnak Nawl An Awnh Cang Nain Dawr Awn Khawh A Si Rih Lo>>>>>>
Chin ramkulh, Hakha khua, Khuathar sang cu SAC lei nih pumhnak nawl an awnh cang hna nain August 20 tiang dawr awnnak nawl bel an awnh rih hna lo tiah Hakha khuami hna sin in thawng theih a si.
June 23 ahcun Khathar sang chung mah le Khrihfabu cio an i pumh khawh a si cang tiah Khuathar sangmi pakhat nih The Chinland Post ah a chim.
“SAC lei nih pumhnak nawl cu an kan awnh cang caah khuathar sangmi hna nih mah le Khrihfabu cio ah kan i pum kho cang. June thla chung vialte kha cu a hmunkip ah i ṭhenṭhek in i pumh cio a rak si” tiah a chim.
Sihmanhsehlaw Khuathar sang chung dawr pawl cu awnnak nawl a pe rih hna lo, 2024 August 20 tiang dawr khar caan an samh piak hna tiah adang Hakha khuami pakhat nih The Chinland Post ah a chim.
“Pumhnak nawl cu an awnh cang nain dawr awnnak nawl cu an kan pe rih lo, August 20 tiang dawr awn rih lo ding in an tiah an kan chimh” tiah a chim.
A luancia April 12, Hakha khuachung ah SAC Ministers pawl cit mi mawṭaw cu CDF-Hakha nih Drone in bom an thlak hnawh hna caah dawr le biakinn pawl kha thuhnak caah an hman tiah an puh hna i Khuathar sang dawr vialte khar ding le minung 5 leng i but lo ding tiah April 22 ah SAC nih nawl a rak chuah.
SAC lei cathanh chung ah June 20 tiang rii an rak khiahpiak mi hna a si i atu cun June 20 a luan cang caah pumhnak nawl an awnh hna nain, dawr awnnak nawl bel an awnh rih hna lo hi a si.
Cun Chin ramkulh, Hakha khuachung ah SAC ralkap pawl nih mipi an i relh lo kar ah lamṭhen le lamton kip ah hmunhma khuar in mipi cycle aa cit mi kham in toolbox check piak, License check le phone chung VPN check piak hna an hmang tiah theih a si.
Leave a Reply