Mandalay ramṭhen, Madaya peng, Inngyinmyaing khua ah a um mi No.1014 in SAC van ralkap 70 leng an tlau i pehtlaih khawh an si ti lo kong, SAC thawng laaknak hrampi nih an chim.
Nizan June 25, zinglei ah Mandalay ramṭhen, Madaya peng nichuahlei, Setawgyi tidil pawng Inngyinmyaing khua ah a um mi No.1014 SAC van ralkap cu PDF ṭangṭi phu nih luhhnawh in an kah hna hnu ah No.1014 SAC van ralkap 70 leng an tlau i pehtlaih khawh an si ti lo, tiah theih a si.
“Nizan June 25, zinglei suimilam 9:30 hrawng in pehtlaih khawh an si ti lo i kahdohnak ah maw an thih, siloah an tlaih hna dah tibantuk thawng fiang theih khawh a si rih lo,” tiah SAC thawng laaknak hrampi nih an chim.
Nizan June 25, zinglei suimilam 8:00 hrawng in Madaya peng, nichuahlei ah a um mi SAC van ralkap pawl cu PDF ṭangṭi phu nih luhhnawh in an kah hna i SAC ralkap nih vanlawng in bomb an thlak. Cu kahdohnak ah cun Madaya peng tualchung hriamtlai phu le PDF-Mandalay an ṭangṭi, tiah theih a si.
Salai Isaac Khen Cu A Rian In Dinhter Chung A Si Kong NUG Nih An Thanh>>>>>>>
National Unity Government(NUG) Foreign Ministry India ram palai Salai Isaac Khen cu a ṭuan cuahmah lio mi rian in dinhter chung a si kong, NUG Foreingn Ministry nih nizan June 25 ah an thanh.
Zung rianṭuan nu pakhat cu tuaitam le hnahnawhnak pek ti mi report-nak ca he pehtlai in Ministry chung ah chekhlatnak tuah a si i cu chekhlatnak cu nupa sinak kong ah tuaitam hnahawhnak, hlawknak kawlnak le hramhram in tuaitamnak runvennak phung zohfeltu Committee sin ah ap a si, tiah NUG Foreingn Ministry nih an thanh.
NUG Foreingn Ministry, India ram palai zung he pehtlai in Report-nak konglam cu zung kip nih chekhlatnak an tuah i dantat an timh kong, a luancia June 21 ni ah khan NUG Foreingn Ministry nih an rak thanh.
Nupa sinak kong he pehtlai in tuaitam ka tong a titu nu cu a luancia April 30 ni ah a rian in dinhter a si nain a duh lo caah amah pumpak duhthimnak in May 14 ni ah khan NUG Foreingn Ministry sin ah chuahnak ca a ṭial. Tuaitam ka tong a titu nu nih hin NUG Foreingn Ministry sin ah May 8 ni ah report-nak a rak tuah nain Insaac Khen cung ah dantatnak zeihmanh an tuah lo, tiin chuahnak ca a ṭial mi ah an langhter chih. Cu pin ah tuaitam ka tong a titu a hawile pahnih zong an rian in an dinhter ve hna, tiah theih a si.
Atu bantukin thilsual a tuahtu cu fak piin dantat ding in le tuaitam ka tong a ti mi nu ca ah a rannak in tlukruannak tuahpiak ding in Women’s League of Burma(WLB) nih June 23 ni ah an thanh. Cun nubu hruainak phu dangdang zong nih duhlonak an langhternak le chekhlatnak tuah colh ding in nawlnak an tuah ve.
Hi kong he pehtlai in Salai Isaac Khen nih cun, “Atu lio a cang mi thawngpang kong ah pumpak in siseh a bu in siseh keimah sin ah fiang tein hal khawh ka si,” tiah a luancia June 21 ah khan amah pumpak hman mi Facebook ah a langhter ve.
Leave a Reply